నేరాల బాట వీడకపోతే కఠిన చర్యలు

విజయవాడ, అక్టోబర్‌ 4: నగరంలో శాంతిభద్రతల పరిరక్షణకు పోలీసులు ప్రత్యేక చర్యలు చేపట్టారు. ఇందులో భాగంగా మాచవరం పోలీస్‌స్టేషన్‌లో రౌడీషీటర్లకు సీఐ చంద్రశేఖర్‌ కౌన్సెలింగ్‌ నిర్వహించారు. గత నేర ప్రవృత్తిని విడిచిపెట్టి ప్రవర్తనలో మార్పు తెచ్చుకోవాలని సూచించారు. గంజాయి, మద్యం తదితర మత్తు పదార్థాలకు దూరంగా ఉంటూ కుటుంబాలతో ప్రశాంత జీవనం గడపాలని చెప్పారు. చట్టవిరుద్ధ కార్యకలాపాలకు పాల్పడినా, శాంతిభద్రతలకు విఘాతం కలిగించేలా వ్యవహరించినా కఠిన చర్యలు తప్పవని హెచ్చరించారు. ప్రతి ఒక్కరి కదలికలపై పోలీసుల నిఘా ఉంటుందని, పాత పద్ధతులను కొనసాగిస్తే చట్టప్రకారం చర్యలు తీసుకుంటామని సీఐ చంద్రశేఖర్‌ స్పష్టం చేశారు.