మూడులక్షల సొంతిళ్లకు చంద్రబాబు శ్రీకారం!

విజయవాడ, అక్టోబర్‌ 4: రాష్ట్రంలో ప్రధానమంత్రి ఆవాస్‌ యోజన గ్రామీణ–2.0 పథకం కింద మూడు లక్షల ఇళ్ల నిర్మాణాలకు ముఖ్యమంత్రి నారా చంద్రబాబు నాయుడు శంకుస్థాపన చేశారు. ఈ సందర్భంగా కేంద్ర మంత్రి శివరాజ్‌సింగ్‌ చౌహాన్‌తో కలిసి గుంటూరు జిల్లా బుర్రిపాలెంలో పైలట్‌ ప్రాజెక్టుగా చేపట్టనున్న 3డీ కాంక్రీట్‌ ప్రింటింగ్‌ ఇళ్ల పనులను ప్రారంభించారు. ఈ వినూత్న సాంకేతిక విధానంతో ఇళ్ల నిర్మాణానికి పట్టే సమయంతోపాటు ఖర్చు కూడా తగ్గుతుందని ముఖ్యమంత్రి తెలిపారు. తక్కువ సమయంలో నాణ్యమైన గృహాలను నిర్మించేందుకు ఈ సాంకేతికత ఉపయోగపడుతుందన్నారు. ప్రస్తుతం ఒక నమూనా ఇంటిని రూపొందించగా, భవిష్యత్తులో లబ్ధిదారులకు ఎనిమిది రకాల డిజైన్లను అందుబాటులో ఉంచేందుకు చర్యలు చేపడుతున్నట్లు వెల్లడించారు.