వైభవంగా వెంకటేశ్వరస్వామి పవిత్రోత్సవాలు

ఏలూరు, సెప్టెంబర్‌ 24: ఏలూరు నగరంలో గురువారం నిర్వహించిన ఆధ్యాత్మిక, సేవా కార్యక్రమాల్లో ఎమ్మెల్యే, తెలుగుదేశం పార్టీ జిల్లా అధ్యక్షుడు బడేటి రాధాకృష్ణయ్య చంటి పాల్గొన్నారు. ఆర్‌ఆర్‌పేటలో శ్రీ వెంకటేశ్వరస్వామి దేవస్థానం ఇరవై ఐదో వార్షిక పవిత్రోత్సవాల్లో పాల్గొని ప్రత్యేక పూజలు నిర్వహించిన ఆయన, అనంతరం పత్తేబాదలో నిర్మించనున్న ఉద్యోగినుల వసతిగృహానికి శంకుస్థాపన చేశారు. ఆలయ కమిటీ ఛైర్మన్‌ పాలడుగు వెంకట రమాదేవి ఆధ్వర్యంలో వెంకటేశ్వరస్వామి పవిత్రోత్సవాలు వైభవంగా ప్రారంభమయ్యాయి. ఎమ్మెల్యే బడేటి చంటి, ఆయన సతీమణి మీనా స్వామివారికి ప్రత్యేక పూజలు చేశారు. ఆలయ కమిటీ సభ్యులు ఎమ్మెల్యే దంపతులను పట్టువస్త్రాలతో సత్కరించారు. ప్రధాన

అర్చకులు కిలాంబి మారుతి శ్రీనివాస రామానుజాచార్యులు వేద ఆశీర్వచనాలు అందించారు. ఈ సందర్భంగా ఆలయంలో హోమాలు, వేదపారాయణం నిర్వహించారు. అనంతరం పత్తేబాద నర్సింగ్‌ పాఠశాల ప్రాంగణంలో రెడ్‌క్రాస్‌ ఆధ్వర్యంలో నిర్మించనున్న ఉద్యోగినుల వసతిగృహానికి ఎమ్మెల్యే శంకుస్థాపన చేశారు. ఉద్యోగం, విద్య కోసం ఏలూరుకు వచ్చే మహిళలకు సురక్షిత వసతి కల్పించేందుకు ఈ భవనం దోహదపడుతుందని తెలిపారు. వసతిగృహ నిర్మాణానికి రూ.50 లక్షలు విరాళంగా అందించిన కొవ్వలి గ్రామానికి చెందిన బూసి యేసేబు, ప్రభావతి దంపతులు, వారి కుటుంబ సభ్యులను ఎమ్మెల్యే అభినందించారు. కార్యక్రమంలో రెడ్‌క్రాస్‌ ఛైర్మన్‌ డాక్టర్‌ ఎంబీఎస్‌వీ ప్రసాద్‌, విద్యార్థులు, సిబ్బంది పాల్గొన్నారు.