వృద్ధులు, దివ్యాంగుల సేవలో దుర్గమ్మ దేవస్థానం!

విజయవాడ, అక్టోబర్ 13: దసరా శరన్నవరాత్రి మహోత్సవాల సందర్భంగా ఇంద్రకీలాద్రిపై శ్రీ కనకదుర్గమ్మ దర్శనానికి తరలివస్తున్న వృద్ధులు, దివ్యాంగుల సౌకర్యార్థం దేవస్థానం ప్రత్యేక రవాణా ఏర్పాట్లు చేసింది. భక్తులు ఇబ్బందులు పడకుండా కాళేశ్వరరావు మార్కెట్‌ నుంచి దుర్గాఘాట్‌ వరకు ఉచిత బస్సులను అందుబాటులోకి తీసుకొచ్చింది.

ముఖ్యంగా వయోవృద్ధులు, దివ్యాంగులు అమ్మవారి దర్శనానికి చేరుకునేందుకు ప్రత్యేక వ్యాన్లు, బ్యాటరీ వాహనాలను ఏర్పాటు చేసింది. నడవడానికి ఇబ్బందులు పడే భక్తులకు ఈ వాహనాలు ఎంతో ఉపయోగకరంగా మారనున్నాయి. దసరా ఉత్సవాలకు వచ్చే ప్రతి భక్తుడికి సౌకర్యవంతమైన దర్శనం కల్పించాలనే లక్ష్యంతో దేవస్థానం అధికారులు ఏర్పాట్లు చేపట్టారు.