భక్తుల సౌకర్యమే లక్ష్యంగా దసరా సన్నాహాలు

విజయవాడ, సెప్టెంబర్‌ 29: దసరా శరన్నవరాత్రి మహోత్సవాలకు తరలివచ్చే లక్షలాది మంది భక్తులకు ఎలాంటి అసౌకర్యం కలగకుండా ఏర్పాట్లు పూర్తిచేయాలని దేవస్థానం కార్యనిర్వహణాధికారి వి.కె. శీనా నాయక్‌ అధికారులను ఆదేశించారు. మంగళవారం సాయంత్రం ఇంద్రకీలాద్రిపై విస్తృతంగా పర్యటించి ఉత్సవ ఏర్పాట్లను క్షేత్రస్థాయిలో పరిశీలించారు. నూతన లడ్డూ పోటు, అన్నదాన భవనాలను తనిఖీ చేసిన ఆయన మిగిలిన చిన్నచిన్న పనులను సైతం ఉత్సవాల నాటికి పూర్తిచేసి అందుబాటులోకి తీసుకురావాలని ఇంజినీరింగ్‌ అధికారులకు సూచించారు. భక్తులకు అందించే ప్రసాదాలు రుచికరంగా, నాణ్యతా ప్రమాణాలకు అనుగుణంగా ఉండాలని స్పష్టం చేశారు. అన్నప్రసాద వితరణ సమయంలో ఇబ్బందులు తలెత్తకుండా అవసరమైన

వసతులన్నీ ముందుగానే సిద్ధం చేయాలన్నారు. అనంతరం కనకదుర్గానగర్‌లో జరుగుతున్న డ్రైనేజీ వ్యవస్థ ఆధునీకరణ పనులను పరిశీలించారు. పారిశుద్ధ్య సమస్యలు తలెత్తకుండా డ్రైనేజీ పనులను యుద్ధప్రాతిపదికన పూర్తిచేయాలని సంబంధిత అధికారులను ఆదేశించారు. దసరా ఉత్సవాల ఏర్పాట్లను అన్ని శాఖల సమన్వయంతో వేగవంతం చేస్తున్నట్లు ఈవో తెలిపారు. క్యూలైన్లు, తాగునీరు, పారిశుద్ధ్యం, ప్రసాదాల పంపిణీ తదితర విభాగాల్లో చిన్న లోపానికీ తావులేకుండా సిబ్బంది అంకితభావంతో పనిచేయాలని సూచించారు. నిర్ణీత గడువులోగా ఏర్పాట్లన్నీ పూర్తిచేసి భక్తులకు సౌకర్యవంతమైన దర్శనం కల్పించాలని ఆదేశించారు. ఈ పర్యటనలో దేవస్థానం కార్యనిర్వాహక ఇంజినీర్‌, ఇంజినీరింగ్‌ అధికారులు పాల్గొన్నారు.