జనసేనలోకి వంగవీటి రాధాకృష్ణ

విజయవాడ, అక్టోబర్‌ 14: దివంగత ప్రజానాయకుడు వంగవీటి మోహనరంగా తనయుడు, మాజీ ఎమ్మెల్యే వంగవీటి రాధాకృష్ణ బుధవారం జనసేన పార్టీలో చేరారు. రాష్ట్ర ఉప ముఖ్యమంత్రి, జనసేన పార్టీ అధ్యక్షుడు పవన్‌ కల్యాణ్‌ ఆయనకు పార్టీ కండువా కప్పి సాదరంగా ఆహ్వానించారు. జనసేన కేంద్ర కార్యాలయానికి తన అనుచరులతో కలిసి చేరుకున్న రాధాకృష్ణను పవన్‌ కల్యాణ్‌ ఆత్మీయంగా ఆలింగనం చేసుకుని స్వాగతం పలికారు. అనంతరం రాధాకృష్ణ తన వెంట వచ్చిన అనుచరులను పవన్‌ కల్యాణ్‌కు పరిచయం చేశారు. వారందరితో పవన్‌ కల్యాణ్‌ ఆప్యాయంగా మాట్లాడి ప్రత్యేకంగా ఫొటోలు దిగారు. జనసేన పార్టీ సిద్ధాంతాలకు అనుగుణంగా అందరూ కలిసికట్టుగా పనిచేయాలని, ప్రజాసేవలో సమష్టిగా ముందుకు సాగాలని సూచించారు. రాధాకృష్ణ జనసేనలో చేరడం విజయవాడ రాజకీయ వర్గాల్లో చర్చనీయాంశమైంది. వంగవీటి కుటుంబానికి నగర రాజకీయాలతో సుదీర్ఘ అనుబంధం ఉన్న నేపథ్యంలో ఆయన రాజకీయ నిర్ణయానికి ప్రాధాన్యం ఏర్పడింది. త్వరలో జరగనున్న స్థానిక సంస్థల ఎన్నికల నేపథ్యంలో రాధాకృష్ణకు పార్టీలో ఎలాంటి బాధ్యతలు అప్పగిస్తారు, విజయవాడలో పార్టీ కార్యకలాపాల్లో ఆయన పాత్ర ఎలా ఉండబోతోందనే అంశాలపై ఆసక్తి నెలకొంది. మేయర్‌ పీఠంపై కొత్త చర్చ విజయవాడ నగరపాలక సంస్థ ఎన్నికల నేపథ్యంలో రాధాకృష్ణ చేరికకు రాజకీయ ప్రాధాన్యం ఏర్పడింది. ఇప్పటికే మేయర్‌ అభ్యర్థిత్వానికి సంబంధించి రాధాకృష్ణతోపాటు ఆయన సతీమణి పుష్పవల్లి పేర్లు ప్రచారంలో ఉన్నాయి. కూటమిలో మేయర్‌ పదవి జనసేనకు కేటాయిస్తారా? రాధాకృష్ణకు అభ్యర్థిత్వం దక్కుతుందా? అనే అంశాలు చర్చనీయాంశంగా మారాయి. అయితే ఈ విషయాలపై అధికారిక ప్రకటన వెలువడాల్సి ఉంది.