శ్రీశైలం దేవస్థానానికి 4 టన్నుల కూరగాయల వితరణ

విజయవాడ, అక్టోబర్ 14: శ్రీశైలంలోని శ్రీభ్రమరాంబ మల్లికార్జున స్వామి దేవస్థానం అన్నప్రసాద ట్రస్టుకు విజయవాడకు చెందిన దాతలు నాలుగు టన్నుల కూరగాయలను విరాళంగా అందజేశారు. పల్చూరి నాగేశ్వరరావు ఆధ్వర్యంలో సమకూర్చిన కూరగాయలను బుధవారం ప్రత్యేక వాహనంలో శ్రీశైలానికి తరలించారు. విజయవాడ రామవరప్పాడులోని ఎస్‌ఎల్‌వీ గ్రీన్ మెడోస్ వద్ద కూరగాయల వాహనాన్ని స్వచ్ఛ ఆంధ్ర కార్పొరేషన్ చైర్మన్ కొమ్మారెడ్డి పట్టాభిరామ్, ఆయన సతీమణి చందన ప్రారంభించారు. వాహనానికి కొబ్బరికాయ కొట్టి, హారతి ఇచ్చి శ్రీశైలానికి పంపించారు. శ్రీశైలం దేవస్థానానికి వచ్చే భక్తులకు అన్నప్రసాద వితరణలో ఉపయోగపడేలా ఈ కూరగాయలను సమకూర్చారు. ఈ సేవా కార్యక్రమంలో పల్చూరి నాగేశ్వరరావు, నాగేంద్ర, బాలాజీ స్వీట్స్ శ్రీనివాస్ భాగస్వాములయ్యారు.