గాంధీజీ సేవలు స్ఫూర్తిదాయకం: సామినేని ఉదయభాను

జగ్గయ్యపేట, అక్టోబర్ 2: జాతిపిత మహాత్మా గాంధీ సేవలు ప్రతి ఒక్కరికీ ఆదర్శనీయమని ఎన్టీఆర్ జిల్లా జనసేన పార్టీ అధ్యక్షుడు సామినేని ఉదయభాను పేర్కొన్నారు. గాంధీ జయంతిని పురస్కరించుకొని జగ్గయ్యపేటలోని తన నివాసంలో గాంధీజీ చిత్రపటానికి పూలమాల వేసి ఘనంగా నివాళులర్పించారు. విజయవాడ జనసేన నాయకుడు గుర్రం రంజిత్‌కుమార్ ఆధ్వర్యంలో స్థానిక పాఠశాలల్లో చదువుతున్న 11 మంది ప్రతిభావంతులైన విద్యార్థులకు ఒక్కొక్కరికి రూ.1,000 చొప్పున నగదు ప్రోత్సాహకాలను అందజేశారు. గోపినేనిపాలెం గ్రామానికి చెందిన మేఘావత్ రేణుకకు జీవనోపాధి కోసం కుట్టుమిషన్‌ను ఉదయభాను, ఆయన సతీమణి విమలభాను పంపిణీ చేశారు. ఈ సందర్భంగా ఉదయభాను మాట్లాడుతూ భారత స్వాతంత్ర్య సంగ్రామంలో మహాత్మా గాంధీ అహింసా సిద్ధాంతంతో పోరాడి

దేశానికి స్వాతంత్ర్యం సాధించారని కొనియాడారు. బ్రిటిష్ పాలకులు ఎన్ని ఇబ్బందులకు గురిచేసినా గాంధీజీ అహింసా మార్గాన్ని వీడలేదన్నారు. ప్రతిభావంతులైన విద్యార్థులను ప్రోత్సహిస్తూ సేవా కార్యక్రమాన్ని నిర్వహించిన గుర్రం రంజిత్‌కుమార్‌ను అభినందించారు. కార్యక్రమంలో మున్సిపల్ వైస్ చైర్మన్ తుమ్మల ప్రభాకరరావు, కౌన్సిలర్లు కొలగాని రాము, కాశి కిషోర్, మాజీ కౌన్సిలర్లు చారుగుండ్ల కొండా, శేషం ప్రసాద్, మరిశెట్టి కోటేశ్వరరావు, మాజీ జడ్పీటీసీ సభ్యుడు శ్రీరాములు నాయక్, జనసేన నాయకులు మేడూరి వెంకటాద్రి, ఈమని కిషోర్, కొమ్మరవపు భానుప్రసాద్, సామినేని రాము, పెద్దాపురపు సుధీర్, తాటకనూరి శ్రీనివాసబ్రహ్మం, దాసరి శ్రీనివాసరావు, గుంటుపల్లి సీతారాముడు, దేవరగట్ల రాజేంద్ర తదితరులు పాల్గొన్నారు.