సౌర విద్యుత్‌తో ఇంటి ఖర్చులకు ఉపశమనం

విజయవాడ, అక్టోబరు 6: ఇంటి పైకప్పులపై సౌర విద్యుత్‌ వ్యవస్థలను ఏర్పాటు చేసుకోవడం ద్వారా విద్యుత్‌ ఖర్చులను తగ్గించుకోవచ్చని విజయవాడ సెంట్రల్‌ ఎమ్మెల్యే బొండా ఉమామహేశ్వరరావు అన్నారు. అర్హులైన ప్రతి కుటుంబం ప్రధాన మంత్రి సూర్య ఘర్‌ ముఫ్త్‌ బిజ్లీ యోజన ప్రయోజనాలను సద్వినియోగం చేసుకోవాలని పిలుపునిచ్చారు. అజిత్‌సింగ్‌నగర్‌లోని విద్యుత్‌ శాఖ సెక్షన్‌ కార్యాలయంలో మంగళవారం నిర్వహించిన ‘సేవా సేతు’ సౌర విద్యుత్‌ అవగాహన శిబిరాన్ని ఆయన ప్రారంభించారు. వినియోగదారులతో మాట్లాడి సౌర విద్యుత్‌ వినియోగం, పథకం ప్రయోజనాలపై అవగాహన కల్పించారు. పునరుత్పాదక ఇంధన వనరుల వినియోగాన్ని పెంచడం ద్వారా విద్యుత్‌ పొదుపుతోపాటు పర్యావరణ పరిరక్షణకు దోహదపడవచ్చని తెలిపారు. పథకానికి

సంబంధించిన నమోదు ప్రక్రియ, అర్హతలు, పైకప్పులపై సౌర విద్యుత్‌ వ్యవస్థల ఏర్పాటు తదితర అంశాలను విద్యుత్‌ శాఖ అధికారులు వినియోగదారులకు వివరించారు. ప్రభుత్వ పథకాల ప్రయోజనాలు ప్రజలకు చేరేలా క్షేత్రస్థాయిలో అవగాహన కార్యక్రమాలు నిర్వహించడం అభినందనీయమని బొండా ఉమా పేర్కొన్నారు. అర్హులైన వినియోగదారులకు నమోదులో సహకరించి, పథకం ప్రయోజనాలు అందేలా అధికారులు కృషి చేయాలని సూచించారు. కార్యక్రమంలో ఎన్టీఆర్‌ జిల్లా విద్యుత్‌ శాఖ పర్యవేక్షక ఇంజినీర్‌, ప్రాజెక్టుల డైరెక్టర్‌, విజయవాడ పట్టణ కార్యనిర్వాహక ఇంజినీర్‌, డిప్యూటీ కార్యనిర్వాహక ఇంజినీర్‌, అజిత్‌సింగ్‌నగర్‌ సహాయ కార్యనిర్వాహక ఇంజినీర్‌తోపాటు విద్యుత్‌ పంపిణీ సంస్థ అధికారులు, సిబ్బంది పాల్గొన్నారు.