నేటి సాయంత్రం 5 గంటలతో ప్రచారానికి తెర!

విజయవాడ, అక్టోబర్ 30 : రాష్ట్రంలో మున్సిపల్, కార్పొరేషన్ ఎన్నికల ప్రచారానికి శుక్రవారం సాయంత్రం 5 గంటలతో తెరపడనుంది. నవంబర్ 1న పోలింగ్ జరగనున్న నేపథ్యంలో పోలింగ్ ముగిసే సమయానికి 48 గంటల ముందే ప్రచారాన్ని నిలిపివేయాలని రాష్ట్ర ఎన్నికల సంఘం ఆదేశించింది. దీంతో రాష్ట్రవ్యాప్తంగా 13 కార్పొరేషన్లు, 87 మున్సిపాలిటీలు, నగర పంచాయతీల్లో ఎన్నికల ప్రచారానికి నేటితో బ్రేక్ పడనుంది. సాయంత్రం 5 గంటల తర్వాత బహిరంగ సభలు, ర్యాలీలు, రోడ్‌షోలు, మైక్ ప్రచారాలు నిర్వహించరాదని ఎన్నికల అధికారులు స్పష్టం చేశారు. నిబంధనలను ఉల్లంఘించే అభ్యర్థులు, రాజకీయ పార్టీలపై చట్టపరమైన చర్యలు తీసుకుంటామని హెచ్చరించారు. ఎన్నికల ప్రచారం ముగిసిన వెంటనే సంబంధిత ప్రాంతాల్లో ఓటర్లు కాని బయటి రాజకీయ నాయకులు, కార్యకర్తలు అక్కడి నుంచి వెళ్లిపోవాలని సూచించారు. విజయవాడ నగరపాలక సంస్థ ఎన్నికల నేపథ్యంలో అభ్యర్థులు చివరి రోజు ప్రచారాన్ని ముమ్మరం చేయనున్నారు. ఓటర్లను ఆకట్టుకునేందుకు ప్రధాన రాజకీయ పార్టీలు తమ ప్రచార కార్యక్రమాలను వేగవంతం చేస్తున్నాయి. నవంబర్ 1న ఉదయం 7 గంటల నుంచి సాయంత్రం 5 గంటల వరకు పోలింగ్ జరగనుండగా, నవంబర్ 3న ఓట్ల లెక్కింపు చేపట్టనున్నారు.