దుర్గమ్మ భక్తుల సేవలో కలెక్టర్‌, ఎంపీ

విజయవాడ, అక్టోబర్‌ 11: విజయవాడ ఇంద్రకీలాద్రిపై దసరా శరన్నవరాత్రి ఉత్సవాల సందర్భంగా అమ్మవారి దర్శనం కోసం క్యూలైన్లలో వేచి ఉన్న భక్తులకు ఎన్టీఆర్‌ జిల్లా కలెక్టర్‌ డాక్టర్‌ జి. లక్ష్మీశ, విజయవాడ ఎంపీ కేశినేని శివనాథ్‌ (చిన్ని) తాగునీటి బాటిళ్లను పంపిణీ చేశారు. దసరా ఉత్సవాల నేపథ్యంలో పెద్ద సంఖ్యలో భక్తులు ఇంద్రకీలాద్రికి తరలివస్తున్నందున వారికి ఎలాంటి అసౌకర్యం కలగకుండా చర్యలు చేపడుతున్నట్లు తెలిపారు. ముఖ్యంగా ఎండ తీవ్రత, భక్తుల రద్దీని దృష్టిలో ఉంచుకుని క్యూలైన్లలో తాగునీరు అందుబాటులో ఉండేలా ఏర్పాట్లు చేస్తున్నట్లు పేర్కొన్నారు. సామాన్య భక్తులకు పెద్దపీట వేస్తూ దర్శన ఏర్పాట్లను కొనసాగిస్తున్నట్లు వెల్లడించారు.