శ్రావణ పౌర్ణమి వేళ.. ఇంద్రకీలాద్రి చుట్టూ భక్తి ప్రదక్షిణ

విజయవాడ, ఆగస్టు 28: శ్రావణ పౌర్ణమి పర్వదినాన్ని పురస్కరించుకుని శుక్రవారం ఉదయం ఇంద్రకీలాద్రి గిరి ప్రదక్షిణ భక్తిశ్రద్ధలతో వైభవంగా ప్రారంభమైంది. శ్రీ దుర్గా మల్లేశ్వరస్వామి వార్లతో పాటు శ్రీ విఘ్నేశ్వరుడు, శ్రీ సుబ్రహ్మణ్యస్వామి, శ్రీ ఆంజనేయస్వామి తదితర దేవతలు కొలువైన ఇంద్రకీలాద్రి చుట్టూ పౌర్ణమి రోజున ప్రదక్షిణ చేయడం అత్యంత శ్రేష్ఠమని పండితులు పేర్కొన్నారు.

ఘాట్‌రోడ్డు ప్రవేశ మార్గంలోని శ్రీ కామధేను అమ్మవారి సన్నిధి వద్ద ఆలయ కార్యనిర్వహణాధికారి వీకే శీనానాయక్ ప్రత్యేక పూజలు నిర్వహించి, కొబ్బరికాయ కొట్టి గిరి ప్రదక్షిణను ప్రారంభించారు. దేవస్థానం స్థానాచార్య వి.శివప్రసాద్ శర్మ తదితరులు పూజా కార్యక్రమాలు నిర్వహించారు.

దేవస్థానం ఆధ్వర్యంలో సంప్రదాయ తప్పెట్లు, కోలాట నృత్యాలు, భజన సంకీర్తనలు, మంగళవాయిద్యాలు ప్రత్యేక ఆకర్షణగా నిలిచాయి. వేదపండితుల మంత్రోచ్చారణలు, భక్తుల జయజయధ్వానాల మధ్య గిరి ప్రదక్షిణ ఆధ్యాత్మిక వాతావరణంలో సాగింది.

ఘాట్‌రోడ్డు, కుమ్మరిపాలెం సెంటర్, విద్యాధరపురం, పాలఫ్యాక్టరీ, చిట్టినగర్, కొత్తపేట, బ్రాహ్మణవీధి మీదుగా తిరిగి ఇంద్రకీలాద్రికి చేరుకునేలా ప్రదక్షిణ మార్గాన్ని నిర్ణయించారు.

శ్రీ దుర్గా మల్లేశ్వరులు కొలువైన వాహనం వచ్చే మార్గంలో పలుచోట్ల మహిళలు పసుపు నీళ్లతో రహదారులను శుద్ధి చేసి హారతులు పట్టారు. కొబ్బరికాయలు సమర్పిస్తూ అమ్మవారికి జయజయధ్వానాలు చేశారు. మార్గమంతా దేవస్థానం ఆధ్వర్యంలో భక్తులకు అమ్మవారి కుంకుమ, ప్రసాదాన్ని పంపిణీ చేశారు.

వేలాది మంది భక్తులు గిరి ప్రదక్షిణలో పాల్గొని దుర్గమ్మను, మల్లేశ్వరస్వామిని దర్శించుకున్నారు. ధర్మకర్తల మండలి సభ్యులు అవ్వారు శ్రీనివాసరావు, మన్నే కళావతి తదితరులు కార్యక్రమంలో పాల్గొన్నారు.