ప్రేమ వివాదం.. విజయవాడలో యువకుడికి దేహశుద్ధి!

విజయవాడ క్రైమ్, ఆగస్టు 27: ప్రేమ వ్యవహారం విజయవాడలో ఘర్షణకు దారితీసింది. ఓ యువతిని ప్రేమిస్తున్న సాయిచంద్ అనే యువకుడిపై ఆమె కుటుంబ సభ్యులు దాడికి పాల్పడినట్లు సమాచారం. నగరంలోని నిర్మలా కాన్వెంట్ సమీపంలో యాక్సిస్ బ్యాంక్ వద్ద రాత్రి సమయంలో అతడిని అడ్డగించి కొట్టినట్లు తెలిసింది.

అక్కడితో ఆగకుండా సాయిచంద్‌ను కారులో యనమలకుదురు ప్రాంతానికి తీసుకెళ్లి మరోసారి దాడి చేసినట్లు ఆరోపణలు ఉన్నాయి. అనంతరం అతడిని పెనమలూరు పోలీసులకు అప్పగించినట్లు సమాచారం.

మరోవైపు ఈ వ్యవహారానికి సంబంధించిన యువతిని గుంటూరు రైల్వే స్టేషన్ వద్ద పోలీసులు అదుపులోకి తీసుకున్నట్లు తెలిసింది. యువకుడిపై దాడి ఘటనకు సంబంధించి పటమట పోలీసులు కేసు నమోదు చేసి విచారణ చేపట్టారు.

ప్రేమ వ్యవహారమే ఈ ఘర్షణకు కారణమా, దాడిలో ఎవరెవరు పాల్గొన్నారు, ఘటనకు ముందు ఏం జరిగిందనే అంశాలపై పోలీసులు దర్యాప్తు చేస్తున్నట్లు సమాచారం.