మూలా నక్షత్రం వేళ.. సామాన్య భక్తులకే పెద్దపీట!

విజయవాడ, అక్టోబర్ 15: దసరా శరన్నవరాత్రుల్లో అత్యంత విశిష్టమైన మూలా నక్షత్రం సందర్భంగా శుక్రవారం ఇంద్రకీలాద్రికి లక్షలాది మంది భక్తులు తరలివచ్చే అవకాశం ఉన్న నేపథ్యంలో దేవస్థానం కీలక నిర్ణయాలు తీసుకుంది. సామాన్య భక్తులకు ఎలాంటి ఇబ్బందులు లేకుండా శ్రీ సరస్వతీదేవి అలంకారంలో కనకదుర్గమ్మ దర్శనం కల్పించేందుకు ప్రత్యేక చర్యలు చేపట్టింది. ఈ మేరకు దేవాదాయ శాఖ కమిషనర్ కె. రామచంద్ర మోహన్, దేవస్థానం చైర్మన్ బొర్రా రాధాకృష్ణ (గాంధీ), కార్యనిర్వహణాధికారి వి.కె. శీనా నాయక్ సంయుక్తంగా భక్తులకు పలు సూచనలు చేశారు. అన్ని క్యూలైన్లలో ఉచిత దర్శనమే! మూలా నక్షత్రం రోజున సామాన్య భక్తులకే తొలి ప్రాధాన్యత ఇవ్వాలని దేవస్థానం నిర్ణయించింది. భక్తులు వేగంగా అమ్మవారిని దర్శించుకునేలా అన్ని క్యూలైన్లను ఉచిత దర్శన మార్గాలుగా నిర్వహించనున్నారు. అంతరాలయ దర్శనాలతో పాటు ప్రోటోకాల్, సిఫార్సు దర్శనాలను పూర్తిగా రద్దు చేశారు. భక్తులందరికీ ముఖమండపం నుంచే అమ్మవారి దర్శనం కల్పించనున్నారు. కొండపైకి ప్రైవేటు వాహనాలకు అనుమతి లేదు భారీ రద్దీ నేపథ్యంలో ఇంద్రకీలాద్రిపైకి ప్రైవేటు వాహనాల రాకపోకలను పూర్తిగా నిషేధించారు. ఇప్పటికే జారీ చేసిన సర్వీస్ పాసులతో సహా అన్ని రకాల వాహన పాసులను తాత్కాలికంగా నిలిపివేశారు. అత్యవసర అధికారిక వాహనాలకు మాత్రమే అనుమతి కల్పించనున్నారు.

అమ్మవారికి సీఎం పట్టువస్త్రాలు

మూలా నక్షత్రం సందర్భంగా రాష్ట్ర ముఖ్యమంత్రి నారా చంద్రబాబు నాయుడు శుక్రవారం ఇంద్రకీలాద్రికి విచ్చేసి రాష్ట్ర ప్రభుత్వం తరఫున కనకదుర్గమ్మకు పట్టువస్త్రాలు సమర్పించనున్నారు. ముఖ్యమంత్రి పర్యటన నేపథ్యంలో భద్రత, భక్తుల రాకపోకలపై అధికారులు ప్రత్యేక దృష్టి సారించారు. భక్తులు, ప్రముఖులు దేవస్థానం నిర్ణయాలకు సహకరించాలని, క్రమశిక్షణతో ప్రశాంత వాతావరణంలో అమ్మవారిని దర్శించుకోవాలని అధికారులు విజ్ఞప్తి చేశారు.