కొత్త జంటకు ‘సుజనా పెళ్లి కానుక’

విజయవాడ, ఆగస్టు 31: విజయవాడ పశ్చిమ నియోజకవర్గ పరిధిలో వివాహం చేసుకుంటున్న నూతన దంపతులకు ఎమ్మెల్యే సుజనా చౌదరి ప్రత్యేకంగా ‘సుజనా పెళ్లి కానుక’ అందిస్తూ శుభాకాంక్షలు తెలియజేస్తున్నారు. వివాహ ఆహ్వాన పత్రికను ఎమ్మెల్యే కార్యాలయానికి పంపిన కుటుంబాలకు ఈ కానుకను అందజేస్తున్నారు. ఈ కానుకలో వధువుకు చీర, వరుడికి ప్యాంటు–షర్ట్‌తో పాటు స్వీట్ బాక్స్, పసుపు, కుంకుమలను అందిస్తున్నారు. నూతన దంపతుల జీవితంలో మధుర జ్ఞాపకంగా నిలిచేలా ఈ కార్యక్రమాన్ని కొనసాగిస్తున్నారు. ఈ నేపథ్యంలో పశ్చిమ నియోజకవర్గంలోని 41వ డివిజన్ మసీద్ స్ట్రీట్‌కు చెందిన దివంగత అబ్దుల్ గఫార్, గౌసియా దంపతుల కుమార్తె అబ్దుల్ కౌసర్ వివాహం షేక్ అబుబకర్తో ఆదివారం మౌలానగర్‌లో ఘనంగా జరిగింది. వివాహ వేడుకకు ఎమ్మెల్యే కార్యాలయం తరఫున సుజనా మిత్ర కోఆర్డినేటర్లు హాజరై నూతన వధూవరులకు **‘సుజనా పెళ్లి కానుక’**ను అందజేశారు. కొత్త జంట సుఖసంతోషాలు, ఆయురారోగ్యాలతో ఆనందమయమైన వైవాహిక జీవితం గడపాలని ఆకాంక్షిస్తూ శుభాకాంక్షలు తెలిపారు.