100 పట్టణ స్థానిక సంస్థల ఎన్నికలకు తాత్కాలిక బ్రేక్!

అమరావతి, అక్టోబర్ 22: రాష్ట్రంలో పట్టణ స్థానిక సంస్థల ఎన్నికల ప్రక్రియకు తాత్కాలిక బ్రేక్ పడింది. సుప్రీంకోర్టు ఆదేశాల నేపథ్యంలో రాష్ట్ర ఎన్నికల సంఘం కీలక నిర్ణయం తీసుకుంది. రాష్ట్రవ్యాప్తంగా 13 నగరపాలక సంస్థలు, 87 మున్సిపాలిటీలు, నగర పంచాయతీలు కలిపి మొత్తం 100 పట్టణ స్థానిక సంస్థల్లో ఎన్నికల తదుపరి ప్రక్రియను నిలిపివేస్తూ ఉత్తర్వులు జారీ చేసింది. నామినేషన్ల దాఖలు సమయంలో తమ అభ్యర్థులను అడ్డుకున్నారని వైఎస్సార్ కాంగ్రెస్ పార్టీ సుప్రీంకోర్టును ఆశ్రయించింది. ఈ పిటిషన్‌పై విచారణ జరిపిన ధర్మాసనం ఫిర్యాదులు, వీడియో ఆధారాలు, ఇతర సాక్ష్యాలను పరిశీలించాలని రాష్ట్ర ఎన్నికల సంఘాన్ని ఆదేశించింది. తొలుత 19 పట్టణ స్థానిక సంస్థలకు సంబంధించిన ఫిర్యాదులు ప్రధానంగా ప్రస్తావనకు రాగా, అనంతరం ఎస్‌ఈసీ మొత్తం 100 సంస్థల్లో తదుపరి ఎన్నికల ప్రక్రియను నిలిపివేసింది. నామినేషన్లు దాఖలు చేయలేకపోయిన అభ్యర్థులకు మరో అవకాశం కల్పించాలా వద్దా అనే అంశంపై గురువారం నిర్ణయం తీసుకోనున్నారు. ఇందుకోసం జిల్లా కలెక్టర్లు, ఎన్నికల అధికారులు, పోలీసు కమిషనర్లు, ఎస్పీల నుంచి నివేదికలు కోరారు. నామినేషన్ల గడువు పొడిగించాలని నిర్ణయిస్తే కనీసం 48 గంటల అదనపు సమయం ఇవ్వాలని సుప్రీంకోర్టు సూచించింది. తుది పోటీ అభ్యర్థుల జాబితా ప్రచురణ కూడా వాయిదా పడింది. అక్టోబర్ 25 వరకు జాబితా ప్రచురణను నిలిపివేయాలని ఎస్‌ఈసీ ఉత్తర్వుల్లో పేర్కొన్నారు. ఈ వ్యవహారంపై సుప్రీంకోర్టులో తదుపరి విచారణ అక్టోబర్ 27న జరగనుంది. అప్పటివరకు ఎన్నికల తదుపరి ప్రక్రియపై రాష్ట్ర ఎన్నికల సంఘం తీసుకునే నిర్ణయాలు కీలకంగా మారనున్నాయి.