భవానీల రద్దీపై డ్రోన్ నిఘా!

విజయవాడ, అక్టోబర్ 21: ఇంద్రకీలాద్రిపై కొలువుదీరిన శ్రీ కనకదుర్గమ్మ దర్శనానికి భవానీ దీక్షాధారులు భారీ సంఖ్యలో తరలివస్తున్న నేపథ్యంలో నగరంలో ట్రాఫిక్ నియంత్రణకు పోలీసులు ప్రత్యేక చర్యలు చేపడుతున్నారు. వివిధ ప్రాంతాల నుంచి బస్సులు, కార్లు, ఇతర వాహనాల్లో భక్తులు వస్తుండటంతో ప్రధాన రహదారులు, కూడళ్లలో ట్రాఫిక్ రద్దీ ఏర్పడకుండా ముందస్తు కార్యాచరణ రూపొందించారు. పోలీస్ కమిషనర్ ఎస్.వి. రాజశేఖర్ బాబు ఆదేశాల మేరకు ట్రాఫిక్ డీసీపీ షేక్ షరీనా బేగం పర్యవేక్షణలో ప్రత్యేక ఏర్పాట్లు చేస్తున్నారు. ప్రధాన రహదారులు, కూడళ్లు, బస్సుల రాకపోకలు అధికంగా ఉండే ప్రాంతాలను డ్రోన్ కెమెరాలతో పర్యవేక్షించనున్నారు. రద్దీ ఎక్కువగా ఉన్న ప్రాంతాలను గుర్తించి క్షేత్రస్థాయిలో ట్రాఫిక్ సిబ్బందిని అప్రమత్తం చేయడంతో పాటు అవసరమైన చోట వాహనాలను ప్రత్యామ్నాయ మార్గాల్లోకి మళ్లించనున్నారు. భవానీ దీక్షాధారులను తీసుకువచ్చే బస్సులను నిర్దేశించిన పార్కింగ్ ప్రాంతాల్లోనే నిలిపేలా చర్యలు చేపడుతున్నారు. ప్రధాన రహదారులపై వాహనాలు నిలపకుండా ప్రత్యేక నిఘా ఏర్పాటు చేయనున్నారు. పార్కింగ్ ప్రాంతాల్లో రద్దీ పెరిగితే ప్రత్యామ్నాయ స్థలాలకు వాహనాలను మళ్లించేందుకు ఏర్పాట్లు చేస్తున్నారు. భక్తులు, వాహనదారులు ట్రాఫిక్ పోలీసుల సూచనలు పాటించాలని, నిర్దేశించిన ప్రాంతాల్లోనే వాహనాలను నిలపాలని డీసీపీ షరీనా బేగం సూచించారు. అత్యవసర వాహనాల రాకపోకలకు ఆటంకం కలగకుండా సహకరించాలని కోరారు. భక్తుల సౌకర్యం, ప్రజల భద్రత, సాఫీగా ట్రాఫిక్ నిర్వహణే లక్ష్యంగా ఆధునిక సాంకేతిక పరిజ్ఞానాన్ని వినియోగిస్తున్నట్లు పోలీసులు తెలిపారు.