సమృద్ధిగా వర్షాలు కురవాలని వరుణ జపం

విజయవాడ, అక్టోబరు 6: సమృద్ధిగా వర్షాలు కురిసి రైతులు, ప్రజలు సుఖసంతోషాలతో ఉండాలని ఆకాంక్షిస్తూ వన్‌టౌన్‌లోని పాత శివాలయంలో వరుణ జపం పూజలు భక్తిశ్రద్ధలతో నిర్వహించారు. ఆలయ చైర్మన్‌ ధనేకుల వెంకట సుబ్బారావు, ఆలయ కమిటీ ఆధ్వర్యంలో నిర్వహించిన కార్యక్రమంలో పశ్చిమ నియోజకవర్గ ఇన్‌చార్జి బుద్ధా వెంకన్న పాల్గొని ప్రత్యేక

పూజలు చేశారు. ఈ సందర్భంగా వెంకన్న మాట్లాడుతూ రాష్ట్రంలో సమృద్ధిగా వర్షాలు కురిసి పంటలు పుష్కలంగా పండాలని, ప్రజలు సుభిక్షంగా ఉండాలని శివుడిని ప్రార్థించినట్లు తెలిపారు. ప్రకృతి అనుకూలించి రైతులకు మేలు జరగాలని ఆకాంక్షించారు. కార్యక్రమంలో ఆలయ కమిటీ సభ్యులు, భక్తులు, స్థానిక నాయకులు, కార్యకర్తలు పాల్గొన్నారు.