ప్రియురాలిపై కత్తితో దాడి.. భవనంపై నుంచి దూకి యువకుడి ఆత్మహత్య

విజయవాడ, అక్టోబర్‌ 3: విజయవాడ నగరంలోని న్యూ రాజరాజేశ్వరిపేటలో శనివారం దారుణ ఘటన చోటుచేసుకుంది. ప్రేమ పేరుతో యువతిని వేధిస్తున్నట్లు ఆరోపణలు ఎదుర్కొంటున్న చిన్నా అనే యువకుడు ఆమెపై కత్తితో విచక్షణారహితంగా దాడి చేశాడు. అనంతరం సమీపంలోని భవనంపై నుంచి దూకడంతో తీవ్ర గాయాలై అక్కడికక్కడే మృతి చెందాడు. స్థానికుల సమాచారం ప్రకారం.. యువతితో కొంతకాలంగా పరిచయం ఉన్న చిన్నా శనివారం ఆమె వద్దకు వెళ్లి వాగ్వాదానికి దిగాడు. మాటామాటా పెరగడంతో తన వెంట తెచ్చుకున్న కత్తితో యువతిపై దాడి చేశాడు. మెడతోపాటు శరీరంలోని పలు భాగాలకు తీవ్ర గాయాలు కావడంతో ఆమె రక్తపు మడుగులో కుప్పకూలింది. దాడి అనంతరం భయాందోళనకు గురైన చిన్నా అక్కడే ఉన్న భవనంపైకి వెళ్లి కిందకు దూకాడు. పై నుంచి బలంగా పడటంతో తీవ్ర గాయాలై ప్రాణాలు కోల్పోయాడు. స్థానికులు వెంటనే స్పందించి యువతిని అత్యవసర చికిత్స కోసం సమీపంలోని ఆసుపత్రికి తరలించారు. ప్రస్తుతం ఆమె పరిస్థితి విషమంగా ఉన్నట్లు సమాచారం. ఘటనా స్థలానికి చేరుకున్న పోలీసులు పరిసరాలను పరిశీలించి ఆధారాలు సేకరించారు. యువకుడి మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. కేసు నమోదు చేసి దాడికి దారితీసిన పరిస్థితులు, ఇద్దరి మధ్య ఉన్న పరిచయం తదితర అంశాలపై దర్యాప్తు చేపట్టారు.