గుడ్లవల్లేరులో రూ.1.60 కోట్ల అభివృద్ధి

గుడ్లవల్లేరు, అక్టోబరు 5: గుడ్లవల్లేరు మండలంలో రూ.1.60 కోట్ల విలువైన అభివృద్ధి పనులకు మచిలీపట్నం ఎంపీ వల్లభనేని బాలశౌరి, గుడివాడ ఎమ్మెల్యే వెనిగండ్ల రాము సోమవారం శంకుస్థాపనలు, ప్రారంభోత్సవాలు నిర్వహించారు. గుడ్లవల్లేరు కాలేజీ రోడ్డులో రూ.30 లక్షలతో నిర్మించిన ఫిల్టర్‌ బెడ్‌ను ప్రారంభించారు. ఎన్టీఆర్‌ కాలనీ, నీలకంఠేశ్వరపురం, విన్నకోట గ్రామాల్లో ఒక్కొక్కటి రూ.40 లక్షల చొప్పున మొత్తం రూ.1.20 కోట్లతో నిర్మించనున్న మూడు కమ్యూనిటీ హాళ్లకు భూమిపూజ చేశారు. విన్నకోటలో రూ.10 లక్షలతో నిర్మించిన మరో ఫిల్టర్‌ బెడ్‌ను ప్రారంభించారు. హిందుస్థాన్‌ ఏరోనాటిక్స్‌ లిమిటెడ్‌ సామాజిక బాధ్యత నిధులతో కమ్యూనిటీ హాళ్లను నిర్మిస్తున్నట్లు తెలిపారు. ఈ సందర్భంగా ఎంపీ బాలశౌరి మాట్లాడుతూ గుడివాడ–హనుమాన్‌ జంక్షన్‌ మధ్య 35 కిలోమీటర్ల మేర 216వ జాతీయ రహదారిని నాలుగు వరుసలుగా అభివృద్ధి చేసేందుకు రూ.1,200 కోట్లతో సమగ్ర ప్రాజెక్టు నివేదిక సిద్ధమైందన్నారు. గుడివాడలో 2.6 కిలోమీటర్ల స్పర్‌ రోడ్డుకు రూ.28 కోట్లు మంజూరయ్యాయని చెప్పారు.

పట్టణ పరిధిలోని జాతీయ రహదారి అభివృద్ధికి రూ.24 కోట్ల ప్రతిపాదనలు పంపినట్లు వెల్లడించారు. నందివాడ మండలం పుట్టగుంట వద్ద బుడమేరు వంతెన నిర్మాణానికి రూ.100 కోట్లు, భూసేకరణకు రూ.15 కోట్లు మంజూరైనట్లు తెలిపారు. కేంద్ర, రాష్ట్ర ప్రభుత్వాల సమన్వయంతో నియోజకవర్గానికి మరిన్ని అభివృద్ధి ప్రాజెక్టులు తీసుకొస్తామని హామీ ఇచ్చారు. ఎమ్మెల్యే వెనిగండ్ల రాము మాట్లాడుతూ గుడివాడ నియోజకవర్గంలో అభివృద్ధికి విరామం లేదన్నారు. ప్రజలకు అందుబాటులో ఉంటానని ఇచ్చిన హామీని నూటికి నూరు శాతం నిలబెట్టుకునేందుకు కృషి చేస్తున్నట్లు తెలిపారు. పల్లె పండుగ ద్వారా గ్రామీణ రహదారులను అభివృద్ధి చేస్తున్నామని, ఎంపీ బాలశౌరి సహకారంతో నియోజకవర్గానికి మరిన్ని భారీ ప్రాజెక్టులు తీసుకొస్తామని చెప్పారు. కార్యక్రమాల్లో రాష్ట్ర గిడ్డంగుల సంస్థ చైర్మన్‌ రావి వెంకటేశ్వరరావు, జనసేన నియోజకవర్గ ఇన్‌ఛార్జి బూరగడ్డ శ్రీకాంత్‌, మార్కెట్‌ యార్డు చైర్మన్‌ పొట్లూరి రవి, మండల తెదేపా అధ్యక్షుడు పోలవరపు వెంకటరావు, అధికారులు, కూటమి నాయకులు పాల్గొన్నారు.