విశాఖ మేయర్‌ రేసులో నందమూరి తేజస్విని!

విశాఖపట్నం, అక్టోబర్‌ 14: స్థానిక సంస్థల ఎన్నికల నేపథ్యంలో ఉత్తరాంధ్ర రాజకీయాల్లో కొత్త సమీకరణాలు తెరపైకి వస్తున్నాయి. గ్రేటర్‌ విశాఖపట్నం మున్సిపల్‌ కార్పొరేషన్‌ మేయర్‌ పదవిని జనరల్‌ మహిళకు కేటాయించడంతో అధికార కూటమిలో ఆశావహుల ప్రయత్నాలు ఊపందుకున్నాయి. ఈ క్రమంలో సినీ నటుడు, హిందూపురం ఎమ్మెల్యే నందమూరి బాలకృష్ణ చిన్న కుమార్తె, విశాఖ ఎంపీ మతుకుమిల్లి శ్రీభరత్‌ సతీమణి నందమూరి తేజస్విని పేరు మేయర్‌ అభ్యర్థిత్వానికి సంబంధించి ప్రచారంలోకి వచ్చింది. నందమూరి కుటుంబ నేపథ్యం, విశాఖ ఎంపీ కుటుంబంతో సంబంధాల నేపథ్యంలో తేజస్విని పేరుపై రాజకీయ వర్గాల్లో చర్చ జరుగుతోంది. అయితే ఆమె అభ్యర్థిత్వంపై తెలుగుదేశం పార్టీ నుంచి ఇప్పటివరకు అధికారిక ప్రకటన వెలువడలేదు. మరోవైపు మేయర్‌ పదవిపై జనసేన, బీజేపీ నాయకుల్లోనూ ఆసక్తి నెలకొంది. కూటమి తరఫున ఏ పార్టీ అభ్యర్థిని నిలబెడతారు? మిత్రపక్షాల మధ్య ఏకాభిప్రాయం కుదురుతుందా? అనే అంశాలు రాజకీయంగా ప్రాధాన్యం సంతరించుకున్నాయి. అక్టోబర్‌ 12న జారీ చేసిన జీవో నంబర్‌ 252 ద్వారా విశాఖ మేయర్‌ స్థానాన్ని జనరల్‌ మహిళకు కేటాయించారు. ఈసారి మేయర్‌ను ప్రజలే ప్రత్యక్షంగా ఎన్నుకునే విధానం అమల్లోకి రానుండటంతో అభ్యర్థుల ఎంపిక మరింత ప్రాధాన్యం సంతరించుకుంది.