టీడీపీలోకి సాయి సంజయ్‌ బృందం

విజయవాడ, అక్టోబర్‌ 8: వ్యాపారవేత్త సాయి సంజయ్‌ ఆధ్వర్యంలో ఆయన అనుచరులు సుమారు 300 మంది గురువారం తెలుగుదేశం పార్టీలో చేరారు. పాయకాపురంలోని ఎంఎస్‌ఆర్‌ కన్వెన్షన్‌ హాల్‌లో ప్రభుత్వ విప్‌, సెంట్రల్‌ ఎమ్మెల్యే బొండా ఉమామహేశ్వరరావు, పార్టీ యువనేత బొండా సిద్ధార్థ సమక్షంలో ఈ కార్యక్రమం జరిగింది. సాయి సంజయ్‌తోపాటు ఆయన అనుచరులకు బొండా ఉమా పార్టీ కండువాలు కప్పి స్వాగతం పలికారు. ఈ సందర్భంగా బొండా ఉమా మాట్లాడుతూ, టీడీపీ సిద్ధాంతాలు, ముఖ్యమంత్రి చంద్రబాబు నాయుడు నాయకత్వంపై విశ్వాసంతో పార్టీలో చేరడం సంతోషకరమన్నారు. కొత్తగా చేరిన వారికి సముచిత గౌరవం, గుర్తింపు కల్పిస్తూ పార్టీ కార్యక్రమాల్లో భాగస్వాములను చేస్తామని తెలిపారు. అందరినీ కలుపుకొని నియోజకవర్గంలో పార్టీని మరింత బలోపేతం

చేస్తామన్నారు. కూటమి ప్రభుత్వం అమలు చేస్తున్న అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లాలని నాయకులు, కార్యకర్తలకు సూచించారు. అర్హులకు ప్రభుత్వ పథకాల ప్రయోజనాలు అందేలా కృషి చేయాలన్నారు. ప్రజలతో మమేకమై వారి సమస్యలను తెలుసుకోవడంతోపాటు పరిష్కారం కోసం తమ దృష్టికి తీసుకురావాలని కోరారు. ప్రజలకు, ప్రభుత్వానికి మధ్య కార్యకర్తలు వారధిగా పనిచేయాలని పిలుపునిచ్చారు. కార్యక్రమంలో కార్మికుల సలహా కమిటీ చైర్మన్‌ గొట్టుముక్కల రఘురామరాజు, సెంట్రల్‌ నియోజకవర్గ సమన్వయకర్త నవనీతం సాంబశివరావు, ఎమ్మెల్యే కార్యాలయ కార్యదర్శి ఘంటా కృష్ణమోహన్‌, దాసరి ఉదయశ్రీ, పైడి తులసి, పైడి శ్రీను, డీడీ నాయుడు, కంచెటి నాగరాజు, సోమన అనిల్‌, లబ్బా వైకుంఠం, కోలా శ్రీను తదితరులు పాల్గొన్నారు.