కూటమి చైర్మన్‌ అభ్యర్థిగా పులి అరుణకుమారికి మద్దతు

ఇబ్రహీంపట్నం, అక్టోబర్‌ 15: కొండపల్లి పురపాలక చైర్మన్‌ పదవికి కూటమి అభ్యర్థిగా పులి అరుణకుమారికి అవకాశం కల్పించాలని ఆమె మద్దతుదారులు కోరుతున్నారు. స్థానికంగా ప్రజలతో మమేకమై, పార్టీ కోసం క్రియాశీలకంగా పనిచేసిన నాయకత్వానికి ప్రాధాన్యం ఇవ్వాలని విజ్ఞప్తి చేస్తున్నారు. అభ్యర్థి ఎంపికలో ప్రజాదరణ, రాజకీయ అనుభవం, స్థానిక నాయకులతో సమన్వయాన్ని పరిగణనలోకి తీసుకోవాలని పేర్కొంటున్నారు. పార్టీ ప్రతిపక్షంలో ఉన్న సమయంలోనూ ప్రతికూల పరిస్థితులను ఎదుర్కొని విజయం సాధించడం అరుణకుమారికి ఉన్న ప్రజా ఆదరణకు నిదర్శనమని ఆమె అనుచరులు చెబుతున్నారు. పార్టీలో క్రియాశీలకంగా వ్యవహరించడం, సొంత సామాజికవర్గం మద్దతు ఆమెకు ప్రధాన బలాలుగా పేర్కొంటున్నారు. ఇబ్రహీంపట్నం, కొండపల్లి ప్రాంతాల్లో ప్రజలతో ఉన్న అనుబంధం, నాయకులు, సహచరుల అండదండలు కూటమి విజయానికి ఉపయోగపడతాయని అభిప్రాయపడుతున్నారు. స్థానిక పరిస్థితులపై అవగాహన ఉన్న అరుణకుమారికి అవకాశం ఇస్తే ఎన్నికల కార్యాచరణను సమన్వయంతో ముందుకు తీసుకెళ్లగలరని వాదిస్తున్నారు. కొత్త ముఖాలను తెరపైకి తీసుకొస్తే స్థానిక నాయకులు, కార్యకర్తలతో పరిచయాలు పెంచుకుని సమన్వయం సాధించేందుకు సమయం అవసరమవుతుందని మద్దతుదారులు పేర్కొంటున్నారు. ఈ నేపథ్యంలో పార్టీ కోసం పనిచేసిన అనుభవం, స్థానిక బలాన్ని గుర్తించి అరుణకుమారి అభ్యర్థిత్వాన్ని కూటమి నాయకత్వం పరిశీలించాలని కోరుతున్నారు.