స్థానిక పోరులో కూటమికి 58.9 శాతం ఓట్లు!

అమరావతి, నవంబర్ 9: రాష్ట్రంలో ఇటీవల జరిగిన స్థానిక సంస్థల ఎన్నికల్లో ఎన్డీఏ కూటమికి ప్రజల మద్దతు మరింత పెరిగిందని ముఖ్యమంత్రి నారా చంద్రబాబు నాయుడు వెల్లడించారు. ఎన్నికల ఫలితాలపై నిర్వహించిన మీడియా సమావేశంలో ఆయన ఓట్ల శాతం, గెలుచుకున్న స్థానాలు, పట్టణాలు, గ్రామీణ ప్రాంతాల్లో పార్టీల పనితీరుకు సంబంధించిన వివరాలను వెల్లడించారు. 2024 సార్వత్రిక ఎన్నికల్లో కూటమికి 55.3 శాతం ఓట్లు రాగా, తాజా స్థానిక సంస్థల ఎన్నికల్లో 58.9 శాతం ఓట్లు లభించాయని తెలిపారు. గత ఎన్నికలతో పోలిస్తే కూటమి ఓట్ల శాతం 3.6 శాతం పాయింట్లు పెరిగిందన్నారు. వైఎస్సార్ కాంగ్రెస్ పార్టీకి 2024 ఎన్నికల్లో 39.81 శాతం ఓట్లు రాగా, స్థానిక ఎన్నికల్లో 33.56 శాతానికి తగ్గాయని చంద్రబాబు పేర్కొన్నారు. ఆ పార్టీ ఓట్ల శాతం 6.25 శాతం పాయింట్లు తగ్గిందని చెప్పారు. స్థానిక సంస్థల ఎన్నికల్లో కూటమికి, వైసీపీకి మధ్య ఓట్ల శాతంలో 25.34 శాతం పాయింట్ల వ్యత్యాసం నమోదైందని వివరించారు. పట్టణాల్లో కూటమికి 59.9 శాతం ఓట్లు పట్టణ స్థానిక సంస్థల ఎన్నికల్లో ఎన్డీఏకు 59.9 శాతం, వైసీపీకి 34.3 శాతం ఓట్లు లభించాయని సీఎం తెలిపారు. పట్టణాల్లో కూటమి స్ట్రైక్ రేట్ 94 శాతంగా నమోదైందన్నారు. జడ్పీటీసీ ఎన్నికల్లో ఎన్డీఏకు 57.6 శాతం, వైసీపీకి 39.7 శాతం ఓట్లు వచ్చాయని పేర్కొన్నారు. జడ్పీటీసీ ఎన్నికల్లో కూటమి స్ట్రైక్ రేట్ 87.5 శాతంగా ఉందన్నారు. పట్టణాల్లో రెండు పార్టీల మధ్య ఓట్ల వ్యత్యాసం 25.60 శాతం పాయింట్లు కాగా, గ్రామీణ ప్రాంతాల్లో 17.9 శాతం పాయింట్లుగా ఉందని వివరించారు. 9,818 ఎంపీటీసీల్లో 7,803 కూటమికే రాష్ట్రవ్యాప్తంగా 9,818 ఎంపీటీసీ స్థానాలకు ఎన్నికలు జరగగా, కూటమి 7,803 స్థానాలను గెలుచుకుందని చంద్రబాబు వెల్లడించారు. ఈ ఫలితాల ఆధారంగా రాష్ట్రంలోని దాదాపు 90 శాతం మండల పరిషత్ అధ్యక్ష స్థానాలను కూటమి దక్కించుకునే అవకాశం ఉందని అభిప్రాయపడ్డారు. పట్టణ స్థానిక సంస్థల ఎన్నికల్లో పోస్టల్ బ్యాలెట్లలో ఎన్డీఏకు 65.7 శాతం, వైసీపీకి 27.42 శాతం ఓట్లు లభించాయని తెలిపారు. పరిషత్ ఎన్నికల్లో కూటమికి 62.83 శాతం, వైసీపీకి 31.46 శాతం పోస్టల్ ఓట్లు నమోదయ్యాయని వివరించారు. 27 జిల్లాల్లో కూటమి ఆధిక్యం రాష్ట్రంలోని మొత్తం 659 జడ్పీటీసీ స్థానాల్లో 575 స్థానాలను కూటమి గెలుచుకుందని సీఎం పేర్కొన్నారు. మొత్తం 28 జిల్లాల్లో 27 జిల్లాల్లో కూటమి ఆధిక్యం సాధించిందని వెల్లడించారు. అల్లూరి సీతారామరాజు జిల్లాలో మాత్రమే వైసీపీ కూటమి కంటే ఎక్కువ స్థానాలను గెలుచుకుందని చెప్పారు. అనకాపల్లి, కోనసీమ, కాకినాడ, మార్కాపురం, పల్నాడు, పశ్చిమగోదావరి, విశాఖపట్నం జిల్లాల్లో వైసీపీ ఒక్క జడ్పీటీసీ స్థానాన్ని కూడా గెలుచుకోలేదని తెలిపారు. ఈ ఫలితాలు స్థానిక సంస్థల్లో కూటమికి పెరిగిన మద్దతును ప్రతిబింబిస్తున్నాయని చంద్రబాబు అభిప్రాయపడ్డారు.