బీసీలకు 40 శాతం సీట్లు.. చంద్రబాబు కీలక ప్రకటన

విజయవాడ, అక్టోబర్‌ 11: స్థానిక సంస్థల ఎన్నికల నేపథ్యంలో ముఖ్యమంత్రి నారా చంద్రబాబు నాయుడు కీలక వ్యాఖ్యలు చేశారు. మంత్రులు, ఎంపీలు, ఎమ్మెల్యేలు, పార్టీ ఇన్‌చార్జులతో నిర్వహించిన వర్చువల్‌ సమావేశంలో ఎన్నికల సన్నద్ధతపై దిశానిర్దేశం చేశారు. బీసీలకు 40 శాతం మేర సీట్లు కేటాయిస్తామని ప్రకటించారు. ‘జయహో బీసీ.. జనాభాలో సగం.. కూటమి ఇచ్చింది బలం’ అనే నినాదంతో విస్తృత ప్రచారం చేపట్టాలని పార్టీ నేతలకు సూచించారు. స్థానిక సంస్థల ఎన్నికల్లో నేతల పనితీరును అంచనా వేసి రేటింగ్‌లు ఇవ్వనున్నట్లు తెలిపారు. ఎన్నికల్లో కూటమి అభ్యర్థుల విజయమే లక్ష్యంగా సమన్వయంతో పనిచేయాలని స్పష్టం చేశారు. కూటమి బలం మరింత పెరగడానికి ఈ ఎన్నికలే కీలకమని చంద్రబాబు పేర్కొన్నారు.