నందిగామ అభివృద్ధికి సౌమ్య బాట!

నందిగామ, అక్టోబర్ 14: నందిగామ నియోజకవర్గాన్ని అభివృద్ధి పథంలో నడిపించేందుకు ప్రభుత్వ విప్‌, ఎమ్మెల్యే తంగిరాల సౌమ్య ప్రత్యేక దృష్టి సారించారు. గ్రామీణ ప్రాంతాల్లో మౌలిక సదుపాయాల కల్పన, రహదారుల నిర్మాణం, వైద్య సేవల విస్తరణ, పారిశుద్ధ్య నిర్వహణకు ప్రాధాన్యం ఇస్తూ పలు అభివృద్ధి కార్యక్రమాలు చేపట్టారు. నందిగామలో ఆరు జీ+1 కమ్యూనిటీ హాళ్ల నిర్మాణానికి శంకుస్థాపన చేశారు. పట్టణంలోని 7వ వార్డులో ఎస్సీ కమ్యూనిటీ హాల్‌ అభివృద్ధికి రూ.8.60 లక్షలు కేటాయించారు. పల్లగిరి గట్టు ఎస్సీ శ్మశానవాటికలో రూ.16 లక్షల ఎంపీ ల్యాడ్స్‌ నిధులతో షెడ్డు, ప్రహరీ గోడ, రహదారి నిర్మాణ పనులకు శ్రీకారం చుట్టారు. కంచికచర్ల మండలంలో రహదారుల అభివృద్ధికి పెద్దపీట వేశారు. కీసర–ఎస్‌.అమరవరం బీటీ రహదారికి రూ.2 కోట్లు, కీసరలో మరో రహదారికి రూ.30 లక్షలు, కునికినిపాడులో బీటీ రహదారికి రూ.56 లక్షలతో పనులు ప్రారంభించారు. కునికినిపాడులో విలేజ్‌ హెల్త్‌ క్లినిక్‌ను ప్రారంభించి గ్రామీణ ప్రజలకు వైద్య సేవలను చేరువ చేశారు. అనాసాగరంలో ఎక్స్‌ప్రెస్‌, పల్లెవెలుగు బస్సులకు రిక్వెస్ట్‌ స్టాప్‌ మంజూరు కోసం కృషి చేశారు. నందిగామ డంపింగ్‌ యార్డును పరిశీలించి తడి, పొడి చెత్తను వేర్వేరుగా సేకరించి శాస్త్రీయ పద్ధతిలో నిర్వహించాలని మున్సిపల్‌ అధికారులను ఆదేశించారు. అన్ని వర్గాల సంక్షేమంతో పాటు నియోజకవర్గ సమగ్ర అభివృద్ధే లక్ష్యంగా ముందుకు సాగుతున్నట్లు ఎమ్మెల్యే సౌమ్య తెలిపారు.