చిన్నారుల భద్రతకు డిజిటల్‌ రక్షణ

విజయవాడ, అక్టోబర్‌ 11: విజయవాడ ఇంద్రకీలాద్రిపై దసరా శరన్నవరాత్రి ఉత్సవాల సందర్భంగా చిన్నారుల భద్రతకు ప్రత్యేక చర్యలు చేపట్టారు. అమ్మవారి దర్శనానికి వచ్చే కుటుంబాల్లో చిన్నారులు రద్దీలో తప్పిపోకుండా ఉండేందుకు గుర్తింపు ట్యాగ్‌లను అందుబాటులోకి తీసుకొచ్చారు. ఐసీడీఎస్‌ ఆధ్వర్యంలో అంగన్‌వాడీ టీచర్లు చిన్నారులకు ఈ ట్యాగ్‌లను వేస్తున్నారు. ఈ ట్యాగ్‌లపై ప్రత్యేక క్యూ ఆర్‌ కోడ్‌ను ఏర్పాటు చేశారు. చిన్నారులకు ట్యాగ్‌లు వేసే సమయంలో వాటిని స్కాన్‌ చేసి తల్లిదండ్రుల ఫోన్‌ నంబర్లను నమోదు చేస్తున్నారు. ఉత్సవాల రద్దీలో చిన్నారులు తప్పిపోయినప్పుడు కమాండ్‌ కంట్రోల్‌ కేంద్రం ద్వారా ట్యాగ్‌లను పరిశీలించి తల్లిదండ్రుల వివరాలను గుర్తించేలా ఏర్పాట్లు చేశారు. తద్వారా తప్పిపోయిన చిన్నారులను సురక్షితంగా తల్లిదండ్రుల వద్దకు చేర్చేందుకు ఈ విధానం ఉపయోగపడనుంది.