ఐదు వేల మందితో చంద్రబాబుకు ఘన స్వాగతం

విజయవాడ, సెప్టెంబర్ 30: పేదలకు ఇళ్ల పట్టాల పంపిణీ కార్యక్రమంలో పాల్గొనేందుకు విజయవాడకు వచ్చిన ముఖ్యమంత్రి నారా చంద్రబాబునాయుడుకు పశ్చిమ నియోజకవర్గంలో ఘన స్వాగతం లభించింది. వన్‌టౌన్‌లోని వినాయకుడి గుడి వద్ద పశ్చిమ నియోజకవర్గ ఇన్‌ఛార్జి బుద్ధా వెంకన్న ఆధ్వర్యంలో సుమారు ఐదు వేల మంది ప్రజలు, తెలుగుదేశం పార్టీ నాయకులు, కార్యకర్తలు, అభిమానులు ముఖ్యమంత్రికి స్వాగతం పలికారు. చంద్రబాబు రాక సందర్భంగా భారీ సంఖ్యలో తరలివచ్చిన పార్టీ శ్రేణులతో వినాయకుడి గుడి పరిసరాలు జనసంద్రంగా మారాయి. పసుపు జెండాలు చేతబూనిన కార్యకర్తలు పెద్దఎత్తున నినాదాలు చేశారు. దీంతో పశ్చిమ నియోజకవర్గం మొత్తం పండుగ వాతావరణాన్ని సంతరించుకుంది. బుద్ధా వెంకన్న ఆధ్వర్యంలో

చేపట్టిన భారీ జనసమీకరణ కార్యక్రమంలో ప్రత్యేక ఆకర్షణగా నిలిచింది. ఈ సందర్భంగా బుద్ధా వెంకన్న మాట్లాడుతూ దశాబ్దాలుగా నివాస స్థలాలపై హక్కుల కోసం ఎదురుచూస్తున్న పేదలకు పట్టాలు అందించడం చరిత్రాత్మక నిర్ణయమన్నారు. పేద, మధ్యతరగతి కుటుంబాలకు భూమిపై శాశ్వత హక్కులు కల్పించి వారి సొంతింటి కలను ముఖ్యమంత్రి చంద్రబాబు సాకారం చేస్తున్నారని తెలిపారు. ప్రజల సంక్షేమం, రాష్ట్ర అభివృద్ధే లక్ష్యంగా కూటమి ప్రభుత్వం పనిచేస్తోందన్నారు. ముఖ్యమంత్రి చంద్రబాబు తీసుకుంటున్న ప్రజానుకూల నిర్ణయాలకు విజయవాడ పశ్చిమ నియోజకవర్గ ప్రజల సంపూర్ణ మద్దతు ఉందని బుద్ధా వెంకన్న పేర్కొన్నారు. కార్యక్రమంలో కూటమి నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.