పేదల జీవితాల్లో రేపు చారిత్రక ఘట్టం

విజయవాడ, సెప్టెంబర్ 29: పేదల సొంతింటి కలను సాకారం చేసే ‘పేదలకు పట్టాభిషేకం’ కార్యక్రమాన్ని విజయవంతం చేయాలని ప్రభుత్వ విప్, విజయవాడ సెంట్రల్ ఎమ్మెల్యే బొండా ఉమామహేశ్వరరావు పిలుపునిచ్చారు. బుధవారం సింగ్‌నగర్‌లోని మాకినేని బసవపున్నయ్య స్టేడియంలో ముఖ్యమంత్రి నారా చంద్రబాబు నాయుడు చేతుల మీదుగా 24,057 కుటుంబాలకు క్రమబద్ధీకరణ పట్టాలు అందజేయనున్న నేపథ్యంలో మంగళవారం ఆయన స్టేడియంలోని ఏర్పాట్లను పరిశీలించారు. ఈ సందర్భంగా బొండా ఉమా మాట్లాడుతూ విజయవాడ సెంట్రల్ నియోజకవర్గంలోని పేదల చిరకాల కల నెరవేరబోతోందన్నారు. ఎన్నో సంవత్సరాలుగా ఇళ్లలో నివసిస్తున్నప్పటికీ పూర్తి హక్కులు లేని కుటుంబాలకు ఉచిత రిజిస్ట్రేషన్ చేసి శాశ్వత భూహక్కులు కల్పించడం

చారిత్రాత్మక నిర్ణయమని పేర్కొన్నారు. రిజిస్ట్రేషన్‌తో పేదలకు తమ ఇళ్లపై చట్టబద్ధమైన హక్కులు లభిస్తాయని తెలిపారు. పిల్లల చదువులు, వివాహాలు, వైద్య అవసరాలతోపాటు బ్యాంకు రుణాలు పొందేందుకు కూడా ఈ ఆస్తి ఉపయోగపడుతుందన్నారు. పేదలకు శాశ్వత భూహక్కులు కల్పించాలనే అంశాన్ని ముఖ్యమంత్రి దృష్టికి తీసుకెళ్లడంతోపాటు శాసనసభలోనూ ప్రస్తావించి, ప్రభుత్వ ఉత్తర్వు సంఖ్య 30 ద్వారా పరిష్కారం లభించేలా నిరంతరం కృషి చేసినట్లు తెలిపారు. ‘‘ఈ పట్టాలు కేవలం కాగితాలు కావు. పేద కుటుంబాల భవిష్యత్తుకు భరోసా, తరతరాలకు అందే ఆస్తి హక్కు’’ అని బొండా ఉమా పేర్కొన్నారు. తమ జీవితకాల స్వప్నం నెరవేరుతున్నందుకు లబ్ధిదారులు ముఖ్యమంత్రి చంద్రబాబు నాయుడికి కృతజ్ఞతలు తెలిపారు.