ప్రజా సమస్యలకు సత్వర పరిష్కారం

విజయవాడ, సెప్టెంబర్ 25: గొల్లపూడిలోని కార్యాలయంలో మైలవరం ఎమ్మెల్యే వసంత వెంకట కృష్ణప్రసాద్ ప్రజాదర్బార్ నిర్వహించారు. నియోజకవర్గంలోని వివిధ ప్రాంతాల నుంచి వచ్చిన ప్రజలు తమ సమస్యలను ఎమ్మెల్యే దృష్టికి తీసుకువచ్చారు. పోలీస్, పంచాయతీరాజ్, ఆర్‌అండ్‌బీ, రెవెన్యూ తదితర శాఖలకు సంబంధించిన అర్జీలను ఎమ్మెల్యే స్వయంగా స్వీకరించారు. ఇళ్ల స్థలాలు, సామాజిక పింఛన్లు, రహదారులు, మౌలిక సదుపాయాలకు సంబంధించిన సమస్యలను ప్రజలు వివరించారు. ప్రతి అర్జీపై సంబంధిత అధికారులతో మాట్లాడి నిర్ణీత గడువులో పరిష్కారం చూపాలని ఎమ్మెల్యే ఆదేశించారు. ప్రజల సమస్యల పరిష్కారమే లక్ష్యంగా నిరంతరం అందుబాటులో ఉంటానని వసంత కృష్ణప్రసాద్ తెలిపారు.