ఆదాయం ఘనం సౌకర్యాలు శూన్యం

విజయవాడ, సెప్టెంబర్‌ 24: రెండు రోజులుగా కురుస్తున్న భారీ వర్షాలతో నగర జనజీవనం అస్తవ్యస్తమైందని సీపీఐ నగర కార్యదర్శి జి.కోటేశ్వరరావు పేర్కొన్నారు. ప్రజలతోపాటు అధికార యంత్రాంగం అప్రమత్తంగా ఉండాలని సూచించారు. నగరంలోని పలు ప్రాంతాలతోపాటు విజయవాడ రైల్వేస్టేషన్‌, పండిట్‌ నెహ్రూ బస్‌స్టేషన్‌ను ఆయన గురువారం పరిశీలించారు. లోతట్టు ప్రాంతాల్లో వర్షపు నీరు సక్రమంగా వెళ్లే వ్యవస్థ లేకపోవడంతో కాలనీలు జలమయమవుతున్నాయని ఆరోపించారు. వరద నీటి కాలువలను మెరుగుపరచడంలో నగరపాలక సంస్థ ముందుచూపుతో వ్యవహరించకపోవడం వల్లే నీరు ఎక్కడికక్కడ నిలిచిపోతోందన్నారు. నిలిచిన నీటిని ఎప్పటికప్పుడు తోడేందుకు ప్రత్యేక బృందాలను ఏర్పాటు చేయాలని కోరారు. కొండ ప్రాంతాల్లో చరియలు విరిగిపడే ప్రమాదం ఉన్నందున బలహీన ప్రదేశాలను అధికారులు గుర్తించాలని సూచించారు. ప్రజలకు ప్రాణ, ఆస్తినష్టం జరగకుండా ముందస్తు రక్షణ చర్యలు చేపట్టాలని కోరారు. రైల్వేస్టేషన్‌లో పైకప్పు నుంచి వర్షపు నీరు కారడంతో ప్రయాణికులు కూర్చునే ప్రదేశాలు తడిసిపోయాయని కోటేశ్వరరావు తెలిపారు. పండిట్‌ నెహ్రూ బస్‌స్టేషన్‌లోనూ పైకప్పుల నుంచి నీరు కారుతూ ప్రాంగణంలో నిలిచిపోవడంతో ప్రయాణికులు ఇబ్బందులు పడుతున్నారని చెప్పారు. ప్రకటనలు, ఇతర మార్గాల ద్వారా ఆదాయం వస్తున్నప్పటికీ తాగునీరు, పారిశుద్ధ్యం, విశ్రాంతి సౌకర్యాల కల్పనలో రైల్వే, ఆర్టీసీ అధికారులు విఫలమయ్యారని విమర్శించారు. మహిళలకు ఉచిత ప్రయాణ పథకంతో పెరిగిన రద్దీకి అనుగుణంగా బస్సులు, నిరీక్షణ సౌకర్యాలు పెంచాలని డిమాండ్‌ చేశారు. ప్రయాణికులకు మెరుగైన మౌలిక వసతులు కల్పించేందుకు రెండు శాఖల అధికారులు తక్షణ చర్యలు చేపట్టాలని కోరారు.