హక్కుల కోసం పోరాడితే అరెస్టులా?

విజయవాడ, సెప్టెంబర్ 27 : న్యాయమైన హక్కులు, డిమాండ్ల సాధన కోసం ఉద్యమిస్తున్న వార్డు సచివాలయ ఉద్యోగులను అరెస్టు చేయడం అన్యాయమని ఏఐఎస్ఎఫ్ రాష్ట్ర అధ్యక్షుడు ఎం సాయికుమార్‌ విమర్శించారు. పోలీసులను అడ్డుపెట్టుకొని ఉద్యోగుల ఉద్యమాన్ని ప్రభుత్వం అణచివేయలేదని స్పష్టం చేశారు. తమ సమస్యలను పరిష్కరించాలని డిమాండ్‌ చేస్తూ రాష్ట్రవ్యాప్తంగా వార్డు సచివాలయ ఉద్యోగులు ఆదివారం విజయవాడ ధర్నా చౌక్‌లో మహాధర్నా చేపట్టారు. ఈ కార్యక్రమానికి వివిధ జిల్లాల నుంచి వేలాదిమంది ఉద్యోగులు తరలివచ్చారు. అయితే ధర్నాకు వస్తున్న ఉద్యోగులను పోలీసులు రైల్వేస్టేషన్లు, బస్టాండ్లు, అల్పాహార కేంద్రాల వద్ద అదుపులోకి తీసుకున్నారని సాయికుమార్‌ ఆరోపించారు. అరెస్టు చేసిన వారిని ఎక్కడికి తీసుకెళ్తున్నారో కూడా చెప్పకుండా బస్సుల్లో తిప్పుతున్నారని పేర్కొన్నారు. ఇప్పటికే వందలమందిని అదుపులోకి తీసుకున్నప్పటికీ ఉద్యోగులు వెనక్కి తగ్గకుండా ధర్నా చౌక్‌కు చేరుకున్నారని తెలిపారు. న్యాయమైన డిమాండ్లు పరిష్కారమయ్యే వరకు ఉద్యమం కొనసాగుతుందని ఉద్యోగులు స్పష్టం చేసినట్లు చెప్పారు. ధర్నాకు మద్దతు తెలిపేందుకు వెళ్లిన తనను కూడా పోలీసులు అరెస్టు చేశారని సాయికుమార్‌ తెలిపారు. ఉద్యోగులను నిర్బంధించే బదులు వారి సమస్యలపై ప్రభుత్వం చర్చలు జరిపి పరిష్కారం చూపాలని డిమాండ్‌ చేశారు.