ఫుడ్ కంపెనీలపై FSSAI కొరడా

న్యూఢిల్లీ, ఆగస్టు 25: ఆహార ఉత్పత్తుల విషయంలో నిబంధనల ఉల్లంఘనలపై ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) కొరడా ఝళిపించింది. ఇటీవలి నెలల్లో తప్పుదోవ పట్టించే ప్రకటనలు, తప్పుడు క్లెయిమ్స్‌, లేబులింగ్ నిబంధనలను పాటించకపోవడం వంటి అంశాలకు సంబంధించి ఆహార, పానీయ సంస్థలకు 150కి పైగా నోటీసులు జారీ చేసినట్లు వెల్లడించింది.

చర్యలు ఎదుర్కొన్న సంస్థల జాబితాలో నెస్లే ఇండియా, పెప్సీకో, కోకాకోలా ఇండియా, అబాట్ ఇండియా, రెడ్‌బుల్ ఇండియా, డానోన్ ఇండియా, మాన్‌స్టర్ ఎనర్జీ, మోండెలెజ్ ఇండియా, ఫెరెరో ఇండియా తదితర ప్రముఖ కంపెనీలు ఉన్నట్లు FSSAI వెల్లడించింది. నిబంధనలకు విరుద్ధంగా ఉన్న కొన్ని ఉత్పత్తులను కూడా స్వాధీనం చేసుకున్నట్లు తెలిపింది.

ఈ-కామర్స్ రంగంపైనా FSSAI దృష్టి సారించింది. అమెజాన్, ఫ్లిప్‌కార్ట్‌కు సంబంధించి మొత్తం 12 నోటీసులు జారీ చేసినట్లు తెలిపింది. నిబంధనల ఉల్లంఘన నేపథ్యంలో ఒక అమెజాన్ వేర్‌హౌస్ లైసెన్స్‌ను రద్దు చేసినట్లు వెల్లడించింది.

అంతేకాకుండా KFC, మెక్‌డొనాల్డ్స్, పిజ్జా హట్, డొమినోస్, కోస్టా కాఫీ వంటి ఫుడ్ సర్వీస్ సంస్థలకు 30కి పైగా నోటీసులు జారీ చేసినట్లు సమాచారం. డొమినోస్‌కు సంబంధించిన ఐదు లైసెన్సులను సస్పెండ్ చేసినట్లు FSSAI తెలిపింది. నోటీసులు అందుకున్న పలు సంస్థలు ఇప్పటికే దిద్దుబాటు చర్యలు ప్రారంభించినట్లు కూడా పేర్కొంది.

వినియోగదారులకు ఆహార ఉత్పత్తులపై సరైన సమాచారం అందేలా చూడటం, ఆహార భద్రతా ప్రమాణాలు, ప్రకటనలు, లేబులింగ్ నిబంధనలను కచ్చితంగా అమలు చేయించడమే ఈ చర్యల ఉద్దేశంగా FSSAI పేర్కొంది.