రేపు విజయవాడకు మధ్యప్రదేశ్‌ సీఎం

విజయవాడ, అక్టోబర్‌ 16: మధ్యప్రదేశ్‌ ముఖ్యమంత్రి డాక్టర్‌ మోహన్‌ యాదవ్‌ శనివారం విజయవాడకు రానున్నారు. అందిన పర్యటన షెడ్యూల్‌ ప్రకారం అక్టోబర్‌ 17న మధ్యాహ్నం ఒంటిగంటకు గన్నవరం అంతర్జాతీయ విమానాశ్రయానికి చేరుకుంటారు. సాయంత్రం 5.25 గంటలకు వెలగపూడిలో ముఖ్యమంత్రి చంద్రబాబు నాయుడు నివాసానికి వెళ్లనున్నారు. సాయంత్రం 6.35 గంటలకు ఇంద్రకీలాద్రిపై శ్రీ కనకదుర్గమ్మను దర్శించుకోనున్నారు. రాత్రి ఏడు గంటలకు పున్నమి ఘాట్‌లో విజయవాడ ఉత్సవ్‌ కార్యక్రమానికి హాజరుకానున్నారు. విజయవాడ ఉత్సవ్‌–2.0లో భాగంగా శనివారం పున్నమి ఘాట్‌లో గాయని సునీత ప్రత్యక్ష సంగీత ప్రదర్శన నిర్వహించనున్నట్లు నిర్వాహకులు తెలిపారు. మాకినేని బసవపున్నయ్య స్టేడియంలో జరిగే కార్యక్రమానికి సినీ తారలు విజయ్‌ దేవరకొండ, రష్మిక మందన్న హాజరుకానున్నట్లు పేర్కొన్నారు. సాంస్కృతిక ప్రదర్శనలు, సంగీత కార్యక్రమాలతో ప్రేక్షకులను అలరించేందుకు ఏర్పాట్లు చేస్తున్నారు.