దుర్గమ్మకు శ్రీకాళహస్తి పట్టువస్త్రాలు

విజయవాడ, అక్టోబర్ 11: దసరా శరన్నవరాత్రి మహోత్సవాల సందర్భంగా ఇంద్రకీలాద్రిపై కొలువుదీరిన శ్రీ కనకదుర్గమ్మ అమ్మవారికి శ్రీకాళహస్తి దేవస్థానం తరఫున ఆదివారం పట్టువస్త్రాలు, సారె సమర్పించారు. శ్రీకాళహస్తి ఎమ్మెల్యే బొజ్జల సుధీర్‌రెడ్డి, ఆలయ కార్యనిర్వహణ అధికారి బి.కె. వెంకటేశ్వర్లు, దేవస్థానం పాలకమండలి సభ్యులు కలిసి అమ్మవారికి భక్తిశ్రద్ధలతో పట్టువస్త్రాలు అందజేశారు. అనంతరం అమ్మవారిని దర్శించుకుని ప్రత్యేక పూజలు నిర్వహించారు. ఈ సందర్భంగా వారు మాట్లాడుతూ అమ్మవారి ఆశీస్సులు రాష్ట్ర ప్రజలందరిపై ఉండాలని, ప్రతి కుటుంబం సుఖసంతోషాలతో, ఆయురారోగ్యాలతో వర్ధిల్లాలని ఆకాంక్షించారు. ఆలయ సంప్రదాయాలు, ఆధ్యాత్మిక విలువలకు అనుగుణంగా నిర్వహించిన ఈ కార్యక్రమంలో శ్రీకాళహస్తి దేవస్థానం అర్చకులు, సిబ్బంది, ప్రజాప్రతినిధులు పాల్గొన్నారు.