9న కొండేపికి సీఎం చంద్రబాబు

ఒంగోలు, అక్టోబరు 5: ముఖ్యమంత్రి నారా చంద్రబాబు నాయుడు ఈ నెల 9న కొండేపి నియోజకవర్గంలో పర్యటించనున్నారు. నర్సింగోలులో నిర్వహించే ‘మీ భూమి–మీ హక్కు’ కార్యక్రమంలో సుమారు 8,500 మంది రైతులకు రాజముద్రతో ముద్రించిన పట్టాదారు పాస్‌పుస్తకాలను పంపిణీ చేయనున్నారు. సీఎం పర్యటన ఏర్పాట్లను జిల్లా ఇన్‌ఛార్జి మంత్రి ఆనం రామనారాయణరెడ్డి, మంత్రి డోలా బాలవీరాంజనేయస్వామి, కలెక్టర్‌ పి. రాజాబాబు సోమవారం పరిశీలించారు. కలికివాయి బిట్రగుంట, నర్సింగోలు ప్రాంతాల్లో మూడు అనువైన

స్థలాలను పరిశీలించి, నర్సింగోలు సభాస్థలంపై ముఖ్యమంత్రి కార్యాలయానికి నివేదిక పంపాలని నిర్ణయించారు. జిల్లాలో నాలుగు వేల ఎకరాల నిషేధిత భూములకు సంబంధించి గ్రామకంఠాల క్లియరెన్స్‌ ఇచ్చామని మంత్రి డోలా తెలిపారు. నర్సింగోలు గ్రామంలోనే సుమారు 400 ఎకరాలకు క్లియరెన్స్‌ కల్పించినట్లు చెప్పారు. మరో రెండు, మూడు రోజుల్లో సీఎం పర్యటనకు సంబంధించిన పూర్తి కార్యక్రమం ఖరారవుతుందని మంత్రులు వెల్లడించారు. కార్యక్రమంలో జిల్లా అధికారులు, ఎమ్మెల్యేలు, ప్రజాప్రతినిధులు పాల్గొన్నారు.