చెత్తతో నిండిన డ్రైన్లు రోడ్డెక్కుతున్న మురుగు

ప్రసాదంపాడు, సెప్టెంబర్ 25: విజయవాడ రూరల్‌ మండలం ప్రసాదంపాడు గ్రామంలో డ్రైనేజీల నిర్వహణ అస్తవ్యస్తంగా మారింది. చెత్తాచెదారం పేరుకుపోయి కాలువలు పూర్తిగా పూడుకుపోవడంతో కొద్దిపాటి వర్షానికే మురుగునీరు రహదారులపైకి చేరుతోంది. గత రెండు రోజులుగా కురుస్తున్న వర్షాలతో డ్రైనేజీల్లోని చెత్త రోడ్లపైకి కొట్టుకొచ్చి తీవ్ర దుర్గంధం వెదజల్లుతోంది. దీంతో స్థానికులు తీవ్ర ఇబ్బందులు ఎదుర్కొంటున్నారు. దోమలు, ఈగలు పెరిగి సీజనల్‌ వ్యాధులు ప్రబలే ప్రమాదం ఉందని ఆందోళన వ్యక్తం చేస్తున్నారు. పంచాయతీ అధికారులు వెంటనే స్పందించి డ్రైనేజీల్లో పేరుకుపోయిన చెత్తను తొలగించాలని, మురుగునీరు సాఫీగా ప్రవహించేలా చర్యలు చేపట్టాలని గ్రామస్థులు కోరుతున్నారు.