తెల్లవారుజామున మృత్యుఘంటిక.. ఏడుగురిని బలితీసుకున్న రోడ్డు ప్రమాదం

చిలకలూరిపేట, ఆగస్టు 27: పల్నాడు జిల్లా చిలకలూరిపేట సమీపంలో గురువారం తెల్లవారుజామున జరిగిన ఘోర రోడ్డు ప్రమాదం ఏడు నిండు ప్రాణాలను బలితీసుకుంది. ప్రైవేటు ట్రావెల్స్ బస్సు, ప్రయాణికులతో వెళ్తున్న ఆటో ఢీకొనడంతో ఈ విషాదం చోటుచేసుకుంది.

వేలూరు గ్రామానికి చెందిన వారు ప్రకాశం జిల్లాలోని కొండమంజులూరులో జరిగిన పుట్టినరోజు వేడుకకు వెళ్లి తిరిగి స్వగ్రామానికి వస్తుండగా ప్రమాదం జరిగినట్లు సమాచారం. ఆటోలో 15 మంది ప్రయాణిస్తుండగా ఏడుగురు మృతి చెందగా, మిగిలిన వారు గాయపడ్డారు. క్షతగాత్రుల్లో చిన్నారులు కూడా ఉన్నట్లు వెల్లడైంది.

ప్రమాద తీవ్రతకు ఆటో పూర్తిగా ధ్వంసమైంది. సమాచారం అందుకున్న పోలీసులు ఘటనాస్థలికి చేరుకుని సహాయక చర్యలు చేపట్టారు. గాయపడిన వారిని చికిత్స నిమిత్తం ఆస్పత్రులకు తరలించారు. మృతదేహాలను పోస్టుమార్టం కోసం ప్రభుత్వ ఆస్పత్రికి తరలించారు.

ఒకే ప్రాంతానికి చెందిన పలువురు ప్రాణాలు కోల్పోవడంతో వేలూరు గ్రామంలో తీవ్ర విషాదం నెలకొంది. ప్రమాదానికి దారితీసిన కారణాలపై పోలీసులు కేసు నమోదు చేసి దర్యాప్తు చేపట్టారు.