వైసీపీకి షాక్‌.. టీడీపీలోకి ఇద్దరు నేతలు!

విజయవాడ, అక్టోబర్‌ 11: విజయవాడ సెంట్రల్‌ నియోజకవర్గంలో వైఎస్సార్‌ కాంగ్రెస్‌ పార్టీకి చెందిన ఇద్దరు నాయకులు తెలుగుదేశం పార్టీలో చేరారు. మాజీ కాశీ విశ్వేశ్వర దేవాలయ చైర్మన్‌ కొల్లూరు రామకృష్ణ, వైసీపీ యువజన విభాగ నాయకుడు కురిటి శివ తమ అనుచరులతో కలిసి ఆదివారం సాయంత్రం హనుమాన్‌పేటలోని అనుముల లక్ష్మణరావు కళ్యాణ మండపంలో ప్రభుత్వ విప్‌, సెంట్రల్‌ ఎమ్మెల్యే బొండా ఉమామహేశ్వరరావు సమక్షంలో టీడీపీ తీర్థం పుచ్చుకున్నారు. ఈ సందర్భంగా వారికి ఎమ్మెల్యే పసుపు కండువాలు కప్పి పార్టీలోకి ఆహ్వానించారు. ముఖ్యమంత్రి చంద్రబాబు నాయుడు నాయకత్వంలో అమలవుతున్న సంక్షేమ కార్యక్రమాలు, రాష్ట్రంలో జరుగుతున్న అభివృద్ధి పనులకు ఆకర్షితులై పలువురు నాయకులు టీడీపీలో చేరుతున్నారని బొండా ఉమా పేర్కొన్నారు. ప్రజల సమస్యల పరిష్కారమే లక్ష్యంగా పనిచేస్తున్నామని తెలిపారు. పార్టీలో చేరిన వారందరికీ సముచిత గౌరవం కల్పిస్తామని, అందరినీ కలుపుకొని పార్టీని మరింత బలోపేతం చేస్తామని స్పష్టం చేశారు. రాబోయే రోజుల్లో ప్రజాసేవా కార్యక్రమాల్లో చురుకుగా పాల్గొనాలని పిలుపునిచ్చారు. కార్యక్రమంలో టీడీపీ నాయకులు, కార్యకర్తలు పాల్గొన్నారు.