పేదలకు అండగా ముఖ్యమంత్రి సహాయ నిధి

విజయవాడ, అక్టోబరు 7: అనారోగ్యం, ఆర్థిక ఇబ్బందులతో బాధపడుతున్న పేద, మధ్యతరగతి కుటుంబాలకు ముఖ్యమంత్రి సహాయ నిధి అండగా నిలుస్తోందని ప్రభుత్వ విప్‌, సెంట్రల్‌ ఎమ్మెల్యే బొండా ఉమామహేశ్వరరావు అన్నారు. బుధవారం 63వ డివిజన్‌ రాజీవ్‌నగర్‌లోని డాక్టర్‌ బీఆర్‌ అంబేద్కర్‌ విగ్రహం సమీప మైదానంలో ఏడు కుటుంబాలకు రూ.3.20 లక్షల విలువైన ముఖ్యమంత్రి సహాయ నిధి చెక్కులను అందజేశారు. ఈ సందర్భంగా బొండా ఉమా మాట్లాడుతూ.. సెంట్రల్‌ నియోజకవర్గంలో ఇప్పటివరకు ముఖ్యమంత్రి సహాయ నిధి ద్వారా సుమారు రూ.9 కోట్ల విలువైన వైద్య చికిత్స అనుమతి పత్రాలు, చెక్కులను అందజేసినట్లు తెలిపారు. చంద్రబాబు నాయుడు ముఖ్యమంత్రిగా బాధ్యతలు స్వీకరించిన

తర్వాత ఈ నిధి ద్వారా పేదలకు వైద్య సహాయం అందుతోందన్నారు. సమస్యలతో ఎమ్మెల్యే కార్యాలయాన్ని ఆశ్రయించే ప్రజల అర్జీలను పరిశీలించి, సంబంధిత అధికారుల దృష్టికి తీసుకెళ్లి సహాయం మంజూరయ్యేలా కృషి చేస్తున్నామని చెప్పారు. మంజూరైన చెక్కులను డివిజన్‌ స్థాయిలో లబ్ధిదారులకు అందజేస్తున్నామన్నారు. ‘‘అధికారం మాకు అలంకారం కాదు.. ప్రజల పట్ల జవాబుదారీతనం. ప్రజలకు సేవ చేయడం మా బాధ్యత’’ అని పేర్కొన్నారు. కార్యక్రమంలో లబ్బా వైకుంఠరావు, లబ్బా దుర్గ, మోతుకూరి కాసిం, కోలా శ్రీనివాసరావు, మాజీ కార్పొరేటర్‌ పైడి తులసి, పెద్ది శ్రీను, మోదుగుల గణేష్‌, చిగుళ్ల నాగమణి, బైరి శీను, బత్తుల కొండ, షేక్‌ మెహర్‌, బాజీ తదితరులు పాల్గొన్నారు.