జనసేనలోకి వంగవీటి రాధా?.. బెజవాడలో బ్యానర్ల కలకలం!

విజయవాడ, అక్టోబర్ 14: విజయవాడ రాజకీయాల్లో మరో ఆసక్తికర పరిణామం చోటుచేసుకుంది. వంగవీటి రాధాకృష్ణ జనసేన పార్టీలో చేరాలంటూ ఆయన అభిమానులు నగరంలో ఏర్పాటు చేసిన భారీ బ్యానర్లు రాజకీయ వర్గాల్లో చర్చనీయాంశంగా మారాయి. విజయవాడ పటమట ప్రాంతంలో వంగవీటి రాధాకృష్ణకు శుభాకాంక్షలు తెలియజేస్తూ వెలిసిన బ్యానర్లు ప్రత్యేక ఆకర్షణగా నిలిచాయి. జనసేన పార్టీ నేతల చిత్రాలతో కూడిన ఈ బ్యానర్ల ద్వారా రాధాకృష్ణకు పార్టీలోకి రావాలంటూ స్వాగతం పలికారు. మంగళగిరిలోని జనసేన పార్టీ కార్యాలయంలో ఉప ముఖ్యమంత్రి పవన్ కల్యాణ్ సమక్షంలో రాధాకృష్ణ జనసేన కండువా కప్పుకోవాలని అభిమానులు ఆకాంక్షిస్తున్నారు. రాధాకృష్ణ రాజకీయ భవిష్యత్తుపై చర్చ జరుగుతున్న తరుణంలో ఈ బ్యానర్లు ప్రాధాన్యం సంతరించుకున్నాయి. విజయవాడ రాజకీయాల్లో వంగవీటి కుటుంబానికి ప్రత్యేక గుర్తింపు ఉంది. ఈ నేపథ్యంలో రాధాకృష్ణ జనసేనలో చేరితే నగర రాజకీయ సమీకరణాలపై ప్రభావం చూపే అవకాశముందని రాజకీయ వర్గాల్లో చర్చ సాగుతోంది. అయితే జనసేనలో చేరికపై వంగవీటి రాధాకృష్ణ నుంచి ఇప్పటివరకు అధికారిక ప్రకటన వెలువడినట్లు సమాచారం లేదు. అభిమానుల ఆకాంక్షలకు అనుగుణంగా ఆయన నిర్ణయం తీసుకుంటారా లేదా అన్నది ఆసక్తికరంగా మారింది.