మురుగులో మగ్గుతున్న సింగ్‌నగర్!

విజయవాడ, నవంబర్ 13 : అధికారుల కార్యాలయానికి కూతవేటు దూరంలోనే పారిశుద్ధ్యం పడకేసింది. నిత్యం ప్రజలు రాకపోకలు సాగించే సింగ్‌నగర్ ఎమ్మార్వో కార్యాలయం ఎదురుబజారులో మురుగు కాలువలు అధ్వానంగా మారాయి. బ్లాక్ నంబర్లు 1, 2 పరిధిలోని సైడ్ డ్రైనేజీ కాలువలు పూడికతో నిండిపోయి తీవ్ర దుర్గంధం వెదజల్లుతున్నాయని స్థానికులు ఆవేదన వ్యక్తం చేస్తున్నారు. మురుగునీరు నిలిచిపోవడంతో దోమల బెడద విపరీతంగా పెరిగిందని వాపోతున్నారు. ఇళ్ల ముందు మురుగు కంపు భరించలేకపోతున్నామని, దోమల కారణంగా అనారోగ్య సమస్యలు తలెత్తుతున్నాయని ఆందోళన వ్యక్తం చేస్తున్నారు. కార్యాలయం చెంతనే కంపు.. పట్టించుకునేదెవరు? ప్రజల సమస్యలను పరిష్కరించాల్సిన అధికారుల కార్యాలయానికి సమీపంలోనే ఈ పరిస్థితి నెలకొనడం పారిశుద్ధ్య నిర్వహణ తీరుపై ప్రశ్నలు లేవనెత్తుతోంది. కాలువల్లో పేరుకుపోయిన పూడికను కనీసం వారానికి ఒకసారి కూడా తొలగించడం లేదని స్థానికులు ఆరోపిస్తున్నారు. ఫలితంగా మురుగునీటి ప్రవాహానికి ఆటంకం ఏర్పడి దుర్వాసన వస్తోందని చెబుతున్నారు. కాలువల నిర్వహణపై సంబంధిత అధికారులు దృష్టి సారించాలని కోరుతున్నారు. దోమల మోత.. వ్యాధుల భయం! కాలువల్లో నిలిచిపోయిన మురుగునీరు దోమల వ్యాప్తికి కారణమవుతోందని స్థానికులు ఆందోళన చెందుతున్నారు. ముఖ్యంగా చిన్నారులు, వృద్ధులు ఉన్న కుటుంబాలు తీవ్ర ఇబ్బందులు ఎదుర్కొంటున్నాయని చెబుతున్నారు. దోమల బెడదతో రాత్రివేళ ప్రశాంతంగా నిద్రపోలేని పరిస్థితి నెలకొందని వాపోతున్నారు. పారిశుద్ధ్య లోపాలు ఇలాగే కొనసాగితే సీజనల్ వ్యాధులు ప్రబలే ప్రమాదం ఉందని ఆందోళన వ్యక్తం చేస్తున్నారు. పూడిక తీయడానికి కూడా ముహూర్తం కావాలా? స్వచ్ఛతపై విస్తృత ప్రచారం జరుగుతున్నా క్షేత్రస్థాయిలో మాత్రం పరిస్థితులు భిన్నంగా ఉన్నాయని స్థానికులు విమర్శిస్తున్నారు. కాలువల్లో పూడిక తొలగించడం, మురుగునీరు సాఫీగా ప్రవహించేలా చూడడం వంటి కనీస పారిశుద్ధ్య పనులు కూడా సక్రమంగా జరగడం లేదని ఆరోపిస్తున్నారు. సమస్య తీవ్రత పెరిగే వరకు అధికారులు ఎదురుచూడకుండా తక్షణమే స్పందించాలని కోరుతున్నారు. సింగ్‌నగర్ బ్లాక్ నంబర్లు 1, 2 ప్రాంతాల్లో మురుగు కాలువలను పూర్తిస్థాయిలో శుభ్రపరచి, పూడికను తొలగించడంతోపాటు దోమల నివారణ చర్యలు చేపట్టాలని స్థానికులు విజయవాడ నగరపాలక సంస్థ అధికారులను డిమాండ్ చేస్తున్నారు.