ఏలూరు రోడ్డుపై వర్షపు నీటికి అడ్డుకట్ట:ఎమ్మెల్యే గద్దె

విజయవాడ, అక్టోబరు 6: వర్షం కురిసినప్పుడు ఏలూరు రోడ్డుపై నీరు నిలిచి వాహనదారులు, పాదచారులు ఎదుర్కొంటున్న ఇబ్బందులను తొలగించేందుకు సుమారు రూ.7 కోట్లతో పనులు చేపడుతున్నట్లు తూర్పు ఎమ్మెల్యే గద్దె రామమోహన్‌ తెలిపారు. మంగళవారం రెండో డివిజన్‌ మాచవరం డౌన్‌లో ఆర్‌.ఆర్‌. చికెన్‌ సెంటర్‌ సమీపంలో జరుగుతున్న కల్వర్టు నిర్మాణ పనులను అధికారులతో కలిసి పరిశీలించారు. ఈ సందర్భంగా గద్దె మాట్లాడుతూ, చుట్టగుంటగా పిలిచే మాచవరం డౌన్‌లో వర్షపు నీరు నిలిచే సమస్యకు శాశ్వత పరిష్కారం చూపేందుకు చర్యలు తీసుకుంటున్నామన్నారు. ఇటీవల కేంద్రం నుంచి మంజూరైన రూ.7 కోట్లతో కాలువలకు లైనింగ్‌, నీరు సక్రమంగా ప్రవహించేలా మట్టాల సర్దుబాటు పనులు చేపడతామని చెప్పారు. కొండ ప్రాంతాల నుంచి వచ్చే వర్షపు నీరు కాలువల్లోకి చేరేలా ఏర్పాట్లు చేస్తామని, అవసరమైన చోట్ల కల్వర్టులు నిర్మిస్తామని వివరించారు. గతంలో

2014–19 ప్రభుత్వ హయాంలో అప్పటి కేంద్ర మంత్రి వెంకయ్యనాయుడు అందించిన నిధులు, ఎల్‌అండ్‌టీ సహకారంతో ఎస్‌ఆర్‌ఆర్‌ కళాశాల సమీపంలో పెద్ద కల్వర్టు నిర్మించామని గుర్తుచేశారు. దాంతో అక్కడ నీరు నిలిచే సమస్య పరిష్కారమైందని తెలిపారు. స్థానిక నాయకుడు దాసరి గాబ్రియేల్‌ మాట్లాడుతూ, మాచవరం డౌన్‌లో దీర్ఘకాలంగా ఉన్న వర్షపు నీటి నిల్వ సమస్యను ఎమ్మెల్యే దృష్టికి తీసుకెళ్లగా స్పందించి పనులు చేపట్టారని చెప్పారు. స్థానిక ఎస్సీ, ఎస్టీ కాలనీల్లోనూ నీటి పారుదల సమస్యల పరిష్కారానికి పనులు ప్రారంభించినట్లు తెలిపారు. కార్యక్రమంలో సుగసాని రత్న శ్రీకృష్ణప్రసాద్‌, ముత్యాల కృష్ణ, గద్దె రమేష్‌, దోమకొండ రవి, మండవ గణేష్‌, సత్తిబాబు, తాడి బాబురావు, అనిల్‌, అనుముల పూర్ణచంద్రరావు, దుర్గాప్రసాద్‌, షేక్‌ షకీల్‌, ఇంజనీరింగ్‌ అధికారులు సత్యకుమారి, రామారావు తదితరులు పాల్గొన్నారు.