శాప్‌ ఘటనకు జగన్‌ సూత్రధారి: బుద్దా వెంకన్న
ఉపాధ్యాయులపై దాడికి కుట్ర చేశారని ఆరోపణ జగన్‌ను కేసులో చేర్చి అరెస్టు చేయాలని డిమాండ్‌ డీజీపీని కలిసి ఫిర్యాదు చేస్తానని వెల్లడి
విజయవాడ, సెప్టెంబర్ 23 : శాప్‌ కార్యాలయం వద్ద జరిగిన ఘటనకు వైసీపీ అధినేత వైఎస్‌ జగన్‌మోహన్‌రెడ్డే సూత్రధారి అని టీడీపీ జాతీయ ఉపాధ్యక్షుడు బుద్దా వెంకన్న ఆరోపించారు. జగన్‌ను కుట్రదారుడిగా కేసులో చేర్చి అరెస్టు చేయాలని డిమాండ్‌ చేశారు. ఈ మేరకు తాను డీజీపీని కలిసి ఫిర్యాదు చేస్తానని ప్రకటించారు. విజయవాడలో బుధవారం ఆయన మీడియాతో మాట్లాడుతూ దేవినేని అవినాష్‌, వెలంపల్లి శ్రీనివాసరావు, మల్లాది విష్ణు తదితర మాజీ ప్రజాప్రతినిధుల నేతృత్వంలో శాప్‌ కార్యాలయం వద్ద అరాచకం సృష్టించారని ఆరోపించారు. పోలీసులు గేట్లు మూసి తాళాలు వేయకపోతే పరిస్థితి మరింత తీవ్రంగా మారేదన్నారు. కష్టపడి ఉద్యోగాలు సాధించిన ఉపాధ్యాయులపై దాడికి ప్రయత్నించడం దారుణమని పేర్కొన్నారు. టీడీపీ కేంద్ర కార్యాలయంపై గతంలో జరిగిన దాడి ఘటనలో పాల్గొన్న వారిలో 51 మంది శాప్‌ కార్యాలయం వద్దకు వచ్చినట్లు పోలీసులు గుర్తించారని బుద్దా వెంకన్న పేర్కొన్నారు. ఇతర ప్రాంతాల నుంచి వ్యక్తులను తీసుకొచ్చి బందరు రోడ్డులో మూడు గంటలపాటు ప్రజలను భయాందోళనకు గురిచేశారని ఆరోపించారు. బాధ్యులను పోలీసులు గుర్తించి కఠిన చర్యలు తీసుకోవాలని కోరారు. ఆందోళనలు నిర్వహించేందుకు విజయవాడలో ధర్నాచౌక్‌ ఉందని, గతంలో తాము కూడా అక్కడే నిరసన కార్యక్రమాలు చేపట్టామని తెలిపారు. నిరసన పేరుతో శాంతిభద్రతలకు విఘాతం కలిగించడాన్ని సమర్థించలేమన్నారు. శాప్‌ ఘటనలో జగన్‌పై కేసు నమోదు చేసి అరెస్టు చేసే వరకు పోరాటం కొనసాగిస్తానని బుద్దా వెంకన్న స్పష్టం చేశారు.
