ఏపీలో మరో నాలుగు పోలీస్‌ కమిషనరేట్లు

అమరావతి, సెప్టెంబర్‌ 23 : ఆంధ్రప్రదేశ్‌లో కొత్తగా నాలుగు పోలీస్‌ కమిషనరేట్ల ఏర్పాటుకు రాష్ట్ర మంత్రివర్గం ఆమోదం తెలిపింది. ముఖ్యమంత్రి చంద్రబాబు నాయుడు అధ్యక్షతన బుధవారం జరిగిన మంత్రివర్గ సమావేశంలో పలు కీలక నిర్ణయాలు తీసుకున్నారు. రాజమహేంద్రవరం, గుంటూరు, తిరుపతి, కర్నూలు కేంద్రాలుగా నూతన పోలీస్‌ కమిషనరేట్లను ఏర్పాటు చేయాలని నిర్ణయించారు. శాంతిభద్రతల పర్యవేక్షణను మరింత పటిష్ఠం చేయడంతోపాటు పోలీసు సేవలను ప్రజలకు మరింత చేరువ చేయడమే లక్ష్యంగా ప్రభుత్వం ఈ నిర్ణయం తీసుకుంది. రాజధాని అమరావతి పరిధిలోని గ్రామాల్లో రూ.1,548 కోట్లతో మౌలిక వసతుల పనులు చేపట్టేందుకు మంత్రివర్గం అనుమతించింది. అమరావతి మౌలిక వసతుల పనులకు అదనంగా రూ.644.98 కోట్లు, అసెంబ్లీ భవనం స్పైర్‌, రూఫ్‌, లిఫ్టుల నిర్మాణ పనులకు రూ.661 కోట్లు కేటాయించేందుకు అంగీకారం తెలిపింది. భూసమీకరణ పథకం కింద భూములు ఇచ్చిన రైతులకు కనీస యాన్యుటీ చెల్లించేలా నిబంధనలను సవరించేందుకు కూడా మంత్రివర్గం ఆమోదం తెలిపింది.