విజయవాడ ఉత్సవ్‌కు సువేందు అధికారికి ఆహ్వానం

విజయవాడ, అక్టోబరు 6: విజయవాడలో అక్టోబరు 11 నుంచి 20 వరకు నిర్వహించనున్న విజయవాడ ఉత్సవ్‌–2.0కు హాజరు కావాలని పశ్చిమ బెంగాల్‌ ముఖ్యమంత్రి సువేందు అధికారిని కేంద్ర పౌర విమానయాన శాఖ మంత్రి కింజరాపు రామ్మోహన్‌ నాయుడు ఆహ్వానించారు. సోమవారం కోల్‌కతాలోని నబన్నా సభాఘర్‌లో ఆయనను కలిసి దేవీ శరన్నవరాత్రి ఉత్సవాలు, విజయవాడ ఉత్సవ్‌కు సంబంధించిన ఆహ్వాన పత్రికను అందజేసినట్లు కేంద్ర మంత్రి క్యాంపు కార్యాలయం ప్రకటించింది. పది రోజులపాటు జరిగే ఉత్సవాల్లో ఆధ్యాత్మిక, సాంస్కృతిక,

కళా, వినోద కార్యక్రమాలు నిర్వహించనున్నట్లు రామ్మోహన్‌ నాయుడు వివరించారు. మెగా కార్నివాల్‌, వివిధ రాష్ట్రాల సాంస్కృతిక ప్రదర్శనలు ప్రత్యేక ఆకర్షణగా నిలవనున్నాయని తెలిపారు. ‘ఒక నగరం–ఒక వేడుక’ భావనతో విజయవాడ ఆధ్యాత్మిక, సాంస్కృతిక వైభవాన్ని దేశవ్యాప్తంగా చాటేలా ఉత్సవాలను నిర్వహిస్తున్నట్లు పేర్కొన్నారు. ఉత్సవాల్లో పాల్గొని విజయవాడ వైభవాన్ని వీక్షించాలని సువేందు అధికారిని కోరారు. ఆహ్వానాన్ని స్వీకరించిన ఆయన తప్పక హాజరవుతానని తెలిపినట్లు ప్రకటనలో వెల్లడించారు.