భవానీ నామస్మరణతో మార్మోగుతున్న ఇంద్రకీలాద్రి

విజయవాడ, అక్టోబర్ 22: ఇంద్రకీలాద్రి భవానీ నామస్మరణతో మార్మోగుతోంది. శ్రీ కనకదుర్గమ్మ దర్శనానికి వివిధ ప్రాంతాల నుంచి భవానీ దీక్షాధారులు పెద్ద సంఖ్యలో తరలివస్తున్నారు. బుధవారం రాత్రి నుంచి గురువారం తెల్లవారుజాము వరకు భక్తుల రద్దీ కొనసాగింది. భక్తులకు ఎలాంటి అసౌకర్యం కలగకుండా ఆలయ కార్యనిర్వహణాధికారి వీకే శీనా నాయక్ స్వయంగా ఏర్పాట్లను పర్యవేక్షించారు. రాత్రంతా క్షేత్రంలోనే ఈవో పర్యవేక్షణ భవానీ భక్తుల రద్దీని దృష్టిలో ఉంచుకుని ఆలయ ఈవో శీనా నాయక్ బుధవారం రాత్రంతా పోలీసు అధికారులతో కలిసి క్షేత్రంలో పర్యటించారు. క్యూలైన్లు, దర్శన ఏర్పాట్లు, భక్తుల రాకపోకలను నిరంతరం పరిశీలించారు. ఎక్కడా తొక్కిసలాటకు అవకాశం లేకుండా, భక్తులకు ఇబ్బందులు తలెత్తకుండా సిబ్బందికి సూచనలు చేశారు. ఉదయం 5.10 గంటలకే 25,722 మంది దర్శనం భక్తుల రద్దీ నేపథ్యంలో గురువారం తెల్లవారుజామున 2 గంటల్లోపే అమ్మవారి దర్శనాన్ని ప్రారంభించారు. ఉదయం 5.10 గంటల సమయానికి 25,722 మంది భక్తులు శ్రీ కనకదుర్గమ్మను దర్శించుకున్నట్లు ఆలయ వర్గాలు వెల్లడించాయి. భవానీ నామస్మరణతో ఆలయ ప్రాంగణం మార్మోగింది. భక్తుల సేవలో అహర్నిశలు సిబ్బంది భవానీ దీక్షాధారులకు సజావుగా దర్శనం కల్పించేందుకు దేవస్థాన సిబ్బంది, అర్చకులు, పోలీసు సిబ్బంది అహర్నిశలు శ్రమిస్తున్నారు. భక్తుల రద్దీకి అనుగుణంగా క్యూలైన్లను క్రమబద్ధీకరిస్తూ దర్శన ప్రక్రియకు ఆటంకాలు లేకుండా చర్యలు చేపట్టారు. ఏర్పాట్లపై ఈవో శీనా నాయక్ నిరంతర పర్యవేక్షణ కొనసాగిస్తున్నారు.