బంగాళాఖాతంలో మరో అల్పపీడనం!

అమరావతి, అక్టోబర్ 10: బంగాళాఖాతంలో మరో అల్పపీడనం ఏర్పడే అవకాశముందని భారత వాతావరణ శాఖ వెల్లడించింది. థాయ్‌లాండ్‌ గల్ఫ్‌ పరిసరాల్లో కొనసాగుతున్న ఉపరితల ఆవర్తనం ఆదివారం నాటికి అండమాన్ సముద్రంలోకి ప్రవేశించే అవకాశముందని తెలిపింది. దీని ప్రభావంతో మంగళవారం (అక్టోబర్ 13) నాటికి ఆగ్నేయ బంగాళాఖాతంలో అల్పపీడనం ఏర్పడవచ్చని అంచనా వేసింది. అనంతరం ఈ వ్యవస్థ బలపడి పశ్చిమ వాయువ్య దిశగా కదిలే అవకాశాలున్నాయి. ఉత్తర తమిళనాడు, దక్షిణ కోస్తాంధ్ర తీరాల వైపు పయనించవచ్చని కొన్ని వాతావరణ నమూనాలు సూచిస్తున్నప్పటికీ, కచ్చితమైన మార్గం, తీవ్రతపై ఇంకా స్పష్టత రావాల్సి ఉంది. అల్పపీడనం ప్రభావంతో రానున్న రోజుల్లో కోస్తాంధ్ర, రాయలసీమలో వాతావరణ పరిస్థితులు మారే అవకాశముంది. అక్టోబర్ 10నుంచి 13 వరకు రెండు ప్రాంతాల్లోనూ ఉరుములు, మెరుపులతో కూడిన వర్షాలు, బలమైన గాలులు వీచే అవకాశముందని అమరావతి వాతావరణ కేంద్రం హెచ్చరించింది. అల్పపీడనం మరింత బలపడితే కొన్ని ప్రాంతాల్లో భారీ వర్షాలు కురిసే అవకాశాలను కొట్టిపారేయలేమని వాతావరణ అంచనాలు సూచిస్తున్నాయి. అయితే భారీ వర్షాలు కురిసే ప్రాంతాలు, తేదీలపై అధికారికంగా మరింత స్పష్టత రావాల్సి ఉంది. వాయుగుండంగా మారుతుందా? బంగాళాఖాతంలో ఏర్పడనున్న అల్పపీడనం వాయుగుండంగా బలపడుతుందా లేదా అన్న అంశంపై వాతావరణ నమూనాల్లో భిన్నమైన అంచనాలు వ్యక్తమవుతున్నాయి. కొన్ని నమూనాలు వ్యవస్థ మరింత తీవ్రరూపం దాల్చవచ్చని సూచిస్తుండగా, మరికొన్ని సాధారణ అల్పపీడనంగానే కొనసాగవచ్చని అంచనా వేస్తున్నాయి. దీంతో రానున్న రోజుల్లో వెలువడే వాతావరణ శాఖ బులెటిన్లు కీలకంకానున్నాయి. తీరప్రాంత ప్రజలు, మత్స్యకారులు ఎప్పటికప్పుడు అధికారిక వాతావరణ హెచ్చరికలను గమనించాలని అధికారులు సూచిస్తున్నారు. సముద్రంలో గాలుల వేగం, అలల తీవ్రతను బట్టి జారీ చేసే సూచనలను తప్పనిసరిగా పాటించాలని కోరుతున్నారు. వర్షాలు, పిడుగుల సమయంలో ప్రజలు అప్రమత్తంగా ఉండాలని సూచిస్తున్నారు.