సాయికృష్ణ కస్టడీ డెత్‌ కేసులో సంచలనం!

విజయవాడ, అక్టోబర్‌ 9: విజయవాడలో సంచలనం సృష్టించిన గాదె సాయికృష్ణ కస్టడీ మరణం కేసులో కీలక పరిణామం చోటుచేసుకుంది. ఈ కేసును దర్యాప్తు చేస్తున్న ప్రత్యేక దర్యాప్తు బృందం (సిట్‌) సీఐ నాగరాజు సహా ఏడుగురిపై 86 పేజీల చార్జిషీట్‌ను కోర్టుకు సమర్పించింది. పోలీసుల చిత్రహింసల కారణంగానే సాయికృష్ణ మృతి చెందినట్లు సిట్‌ చార్జిషీట్‌లో పేర్కొన్నట్లు సమాచారం.సాయికృష్ణ మరణానికి సంబంధించిన వాస్తవాలను దాచిపెట్టేందుకు నిందితులు ఆధారాలను ధ్వంసం చేసినట్లు సిట్‌ ఆరోపించింది. పోలీస్‌స్టేషన్‌లోని లాకప్‌ డైరీ, జనరల్‌ డైరీలో సాయికృష్ణ వివరాలను నమోదు చేయలేదని, ఘటనకు సంబంధించిన ఆనవాళ్లు కనిపించకుండా లాకప్‌కు రంగులు వేయించారని చార్జిషీట్‌లో పేర్కొంది. అంతేకాకుండా సీసీటీవీ ఫుటేజీని మార్చినట్లు కూడా సిట్‌ వెల్లడించింది. కస్టడీ మరణానికి సంబంధించిన ఆధారాలను తారుమారు చేయడం, వాస్తవాలను కప్పిపుచ్చేందుకు ప్రయత్నించడంపై దర్యాప్తు బృందం ప్రధానంగా దృష్టి సారించింది. సీఐ నాగరాజు సహా ఏడుగురి పాత్రపై సేకరించిన వివరాలను చార్జిషీట్‌లో పొందుపరిచింది. తాజా చార్జిషీట్‌తో ఈ కేసులో న్యాయపరమైన విచారణ కీలక దశకు చేరుకోనుంది. అయితే నిందితులపై మోపిన ఆరోపణలు న్యాయస్థానంలో రుజువు కావాల్సి ఉంది.