భవానీపురం రైతుబజార్‌లో సన్నబియ్యం విక్రయాలు ప్రారంభం

విజయవాడ, అక్టోబర్ 12: ప్రజలకు నాణ్యమైన సన్నబియ్యాన్ని తక్కువ ధరకే అందించాలనే లక్ష్యంతో రాష్ట్ర ప్రభుత్వం ప్రత్యేక విక్రయ కార్యక్రమానికి శ్రీకారం చుట్టింది. ఇందులో భాగంగా సోమవారం విజయవాడ భవానీపురం రైతుబజార్‌లో సన్నబియ్యం విక్రయాలను రాష్ట్ర పౌరసరఫరాల శాఖ మంత్రి నాదెండ్ల మనోహర్ ప్రారంభించారు. ఎన్టీఆర్ జిల్లా జనసేన పార్టీ అధ్యక్షుడు సామినేని ఉదయభాను ఆధ్వర్యంలో నిర్వహించిన ఈ కార్యక్రమంలో ఆధార్‌ కార్డుల ఆధారంగా పలు కుటుంబాలకు సన్నబియ్యం పంపిణీ చేశారు. ప్రజలకు నాణ్యమైన బియ్యాన్ని అందుబాటు ధరల్లో అందించడమే ఈ కార్యక్రమం ప్రధాన ఉద్దేశమని నిర్వాహకులు తెలిపారు. ఈ కార్యక్రమంలో విజయవాడ పశ్చిమ నియోజకవర్గ జనసేన కార్యదర్శి పత్తిపాటి శ్రీధర్, జనసేన పార్టీ సెంట్రల్ ఆంధ్ర జోన్ కన్వీనర్ బాడిత శంకర్‌తో పాటు పార్టీ నాయకులు, కార్యకర్తలు, వీర మహిళలు పెద్ద సంఖ్యలో పాల్గొన్నారు.